«ԵՄ-ն չպետք է լքի տարածաշրջանում իր նոր լավագույն ընկերոջը»

Երեւան: Մեդիամաքս: Բրյուսելի Եվրոպական քաղաքական հետազոտությունների կենտրոնի (CEPS) տնօրեն Կարել Լանոն համոզված է, որ «Հայաստանը կատարել է իր քաղաքակրթական եւ ռազմավարական ընտրությունը»։ «ԵՄ-ի պատասխանը համատեղ հռչակագրի տեսքով՝ Հայաստանի՝ Միությանը հնարավոր միանալու իրավական ջանքերի ուղղակի նշումով, չափազանց դրական է։ Այժմ ԵՄ-ն չպետք է լքի անկայուն, բայց աշխարհաքաղաքականորեն կարեւորագույն տարածաշրջանում իր նոր լավագույն ընկերոջը», - գրում է Լանոն «ԵՄ-ն պետք է անի իրենից կախված ամեն հնարավորը՝ աջակցելու Հայաստանի շրջադարձին դեպի Եվրոպա» հոդվածում։ Մեկնաբանելով մայիսի 5-ին Երեւանում ստորագրված Հայաստանի եւ ԵՄ-ի համատեղ հռչակագիրը ՝ CEPS-ի տնօրենն ընդգծում է, որ «կողմերը պարտավորություններ են ստանձնել սկսելու Հայաստանի երկարաժամկետ աշխարհաքաղաքական վերակողմնորոշումը դեպի Եվրոպա»։ «ԵՄ-ն առաջարկում է ինստիտուցիոնալ ինտեգրում, անվտանգության ոլորտում համագործակցություն, տնտեսության արդիականացում, ներդրումներ կապուղիներում եւ քաղաքական աջակցություն, իսկ Հայաստանը պարտավորվել է աստիճանաբար դառնալ ավելի «ԵՄ-համատեղելի»։ Քանի որ համաձայնությունը ձեռք է բերվել երկրում կարեւորագույն խորհրդարանական ընտրություններից մեկ ամիս առաջ, հնչել են կարծիքներ, թե դա ձեռնտու է իշխող կուսակցությանը։ Ցավոք, այլընտրանքը Ռուսաստանի կողմից աջակցություն վայելող երեք օլիգարխ-միլիարդատերերն են», - գրում է Կարել Լանոն։ «Մտահոգություններ կան, որ Հայաստանն արդեն դառնում է համակարգված եւ մանիպուլյատիվ գործողությունների թիրախ, որոնք ուղղված են քաղաքական գործընթացների, հասարակական միասնության եւ ժողովրդավարական ինստիտուտների դեմ՝ դեզինֆորմացիայի, կիբերհարձակումների, գաղտնի ազդեցության ցանցերի, հակերային հարձակումների եւ տեղեկատվական պատերազմի միջոցով։ Ուժեղանում են ազդեցության քարոզարշավները, սոցիալական ցանցերում մանիպուլյատիվ էկոհամակարգերը եւ կրկնվող հակաեվրոպական նարատիվները, որոնք նպատակ ունեն խորացնել բեւեռացումը եւ թուլացնել հասարակական վստահությունը ժողովրդավարական ինստիտուտների նկատմամբ։ Այս ամենի հետ մեկտեղ Ռուսաստանն ու Կրեմլի հետ կապված կառույցները սպառնում են տնտեսական պատժամիջոցներով։ Սա նշանակում է, որ Հայաստանի ժողովրդավարական կայունությունը կախված է երկրին աջակցելու ԵՄ-ի վճռականությունից», - նշում է հեղինակը։

Go to News Site