Fréttastofa RÚV
Donald Trump Bandaríkjaforseti er kominn til Beijing þar sem hann fundar með Xi Jinping forseta Kína í dag og á morgun. Forsetarnir ræddu saman bak við luktar dyr og búist var við að þeir taki sér minnst klukkustund til skrafs og ráðagerða. Á daginn kom að forsetarnir ræddu saman í tvær klukkustundir. Enn liggur ekki fyrir nákvæmlega hvað fór þeim á milli en fyrirfram var búist við að tollar, stríðið við Íran, málefni Taívan og viðskipti yrðu ofarlega á baugi. Þeir hafa enn engu svarað um hvað þeim fór á milli. Xi Jinping Kínaforseti sagði dyr landsins opnast enn frekar fyrir bandarísk fyrirtæki þegar hann ræddi við á annan tug leiðtoga bandarískra fyrirtækja sem eru í föruneyti Trumps. Þeirra á meðal eru Elon Musk, aðaleigandi Tesla, Tim Cook, forstjóri Apple og Jensen Huang, forstjóri tæknirisans Nvidia. Trump hefur þrýst á Kínverja að kaupa meira af bandarískum vörum en hingað til hefur verið. Fyrir fundinn var efnt til glæsilegrar móttökuathafnar þar sem Xi ávarpaði Trump og velti fyrir sér hvort Bandaríkin og Kína gætu bætt samskipti sín þannig að komist verði hjá Þúkýdídesar-gildrunni svokölluðu, sem lýsir þeirri spennu sem myndast getur þegar rísandi veldi ógnar stöðu þess sem fyrir er og leiðir af sér stríð þótt hvorugt vilji það. Xi sagði ríkin fremur eiga að vinna saman en vera keppinautar. Það tryggi hagsæld og hagsmuni heimsins alls. Trump sagði í sinni ræðu heiður að vera vinur Xis, þeim hefði ávallt tekist að leysa ágreiningsefni í bróðerni. Jafnframt hlakkaði hann til viðræðnanna sem myndu leiða af sér betri samskipti ríkjanna en nokkru sinni fyrr. Kínverskir miðlar hafa eftir Xi Jinping að Taívan-málið geti orðið helsti ásteitingarsteinninn í samskiptum Kína og Bandaríkjanna. Fari allt á versta veg gæti ríkjunum lent saman og jafnvel komið til átaka. Friður á Taívansundi sé mikilvægur Bandaríkjunum og Kína en sjálfstæði Taívan passi ekki inn í þá mynd. Forsetarnir þöglir sem gröfin um hvað þeir ræddu Að loknum fundinum gengu Xi Jinping og Donald Trump um víðfeðmt torgið við Hof himinsins í Beijing. „Frábær staður, stórkostlegur,“ sagði Trump við Xi meðan þeir gengu samhliða um torgið framan við hofið. Það var reist á 15. öld og þar færðu keisarar Ming- og Qing-ættanna fórnir til að biðja um góða uppskeru. Hofið er nú afar vinsæll viðkomustaður ferðamanna. „Kína er sérdeilis fallegt,“ sagði Trump þegar fréttamenn spurðu forsetana báða þrisvar árangurslaust hvort þeir hefðu rætt málefni Taívans á fundi sínum. Trump bætti loks við að samtalið hefði gengið vel. Að lokinni gönguferðinni héldu Trump og fylgdarlið hans að bílalest sem flutti hópinn brott. Xi hefur boðið Trump og bandarísku sendinefndinni til hátíðarkvöldverðar. Trump er aðeins annar sitjandi Bandaríkjaforseta til að heimsækja Hof himinsins. Gerald Ford fór þangað árið 1975. Hins vegar segja kínverskir fjölmiðlar að Henry Kissinger hafi fimmtán sinnum skoðað hofið. Hann átti í utanríkisráðherratíð sinni ríkan þátt í að koma á eðlilegum stjórnmálasamskiptum milli Bandaríkjanna og Kína. Fréttin verður uppfærð eftir því sem frekari tíðindi berast af viðræðunum. Hvað er málið með Taívan? Um 24 milljónir búa í Taívan, sem er eyjaklasi um tvö hundruð kílómetrum suðaustur af Kína. Styr hefur staðið um stöðu þess áratugum saman. Kínversk stjórnvöld líta á eyjurnar sem hluta af Kína en stór hluti Taívana vill lýsa yfir fullu sjálfstæði. Taívan heitir lögformlega Lýðveldið Kína og er lagalegur arftaki stjórnar Chiang Kai-shek sem réð yfir Kína á meginlandinu frá 1927 til 1949. Stjórnin flúði til Taívan eftir ósigur gegn kommúnistum í lok kínversku borgarastyrjaldarinnar og gerir enn í orði kveðnu tilkall til þess að vera hin eina rétta stjórn alls Kína. Þótt Bandaríkjamenn viðurkenni ekki sjálfstæði eyríkisins eiga þeir í óformlegu sambandi við Taívan og hafa selt þangað vopn. Aðeins um tólf ríki, að meðtöldum Páfagarði, viðurkenna sjálfstæði Taívan. Lýðveldið Kína var aðili að Sameinuðu þjóðunum og sat meðal annars í öryggisráðinu til 1971, þegar Alþýðulýðveldið Kína fékk nægan stuðning allsherjarþingsins til að fá Taívönum vísað brott og taka sæti þeirra. Bandaríkjamenn mótmæltu þeirri ákvörðun en tóku árið 1979 upp stjórnmálasamband við Alþýðulýðveldið og slitu á opinber tengsl við Taívan. Kínastjórn hefur af alefli haldið Taívan utan við alþjóðastofnanir á borð við Alþjóðaheilbrigðisstofnunina og leggur þungt að ríkjum heims að viðurkenna ekki sjálfstæði landsins.
Go to News Site