Sannfærður um að franskur landkönnuður hafi átt verulegan þátt í íslensku sjálfstæðisbaráttunni

Árni Snævarr, höfundur ævisögu Gaimards, Maðurinn sem Ísland elskaði, segir að Íslendingaboðið í Kaupmannahöfn 1839 marki ákveðin tímamót í sögu þjóðarinnar. Gaimard sé virtur og vel tengdur maður sem sýni Íslendingum einstakan heiður með velvild sinni. Árni var einn viðmælanda Ástu Andrésdóttur í útvarpsþáttunum Aldrei kærri gestur á Rás 1. Sýndi Íslandi mikinn heiður „Þarna kemur þessi maður sem er svona merkilegur. Og hann tekur þeim ekki bara sem jafningum, heldur heiðrar þá. Og hann heiðrar Ísland og sýnir Íslandi þessa ótrúlegu viðurkenningu, að gefa út allar þessar bækur með þessum stórkostlegu teikningum af Íslandi,“ segir Árni. „Ég er sannfærður um að Gaimard hafi átt verulegan þátt, algjörlega óbeinan, í íslensku sjálfstæðisbaráttunni, með því að efla sjálfstæði Íslendinga, segja við Íslendinga: þið eruð ekki bara jafn góðir og Danir, þið eruð jafnvel betri ef eitthvað er. Þetta skiptir alveg ótrúlegu máli.“ Árni segir að ekki megi líta söguna með augum samtímans. „Okkur finnst öllum sjálfsagt að við séum Íslendingar, að Ísland sé sjálfstætt ríki, að Íslendingar tali sitt eigið tungumál, en það var ekkert svo sjálfsagt á þessum tíma.“ Fjallað var um Paul Gaimard í þáttunum Aldrei kærri gestur á Rás 1. Ásta Andrésdóttir hafði umsjón með þáttunum. Árið 1839 var haldið fjölmennt Íslendingaboð í Kaupmannahöfn, þar sem Jónas Hallgrímsson og fleiri sjálfstæðishetjur voru meðal gesta. Heiðursgestur var franski landkönnuðurinn Paul Gaimard, sem hafði stýrt tveimur vísindaleiðöngrum um Ísland.

Go to News Site