COPE
A figura de Begoña Caamaño, a escritora, xornalista e activista feminista homenaxeada este ano no Día das Letras Galegas, deixou unha pegada profunda non só na literatura, senón tamén no eido social e na defensa da lingua. Falecida prematuramente aos 50 anos, a súa amiga e directora teatral, a ferrolá Pim Patinho, está a percorrer Galicia para redescubrir o seu legado, que ten unha especial conexión con Ferrol. A obra de Caamaño, aínda que consta de só dous libros, é considerada un referente na narrativa galega contemporánea. A súa achega foi anovar a literatura galega recollendo os mitos clásicos, como na súa obra 'Circe ou o pracer do azul' ou "Morgana en Esmelle" para darlles unha nova perspectiva. Patiño explica que Caamaño "colleu o mito de Homero, que lera con 11 anos, pero no que non tiña unha figura feminina onde reflectirse". Sen cambiar a historia, deulles voz ás mulleres, mostrando as súas motivacións e a súa visión do mundo. Para a súa amiga, o traballo de Begoña Camaño foi un exercicio de transformar o pensamento en arte: "É como coller a teoría feminista e facer literatura. A min paréceme un libro completamente fundamental". Deste xeito, a autora explorou o mundo interior de arquetipos como a muller fiel ou a feiticeira, rachando cos estereotipos tradicionais. A súa segunda novela, Morgana en Esmelle, está directamente vencellada á comarca de Ferrol. Patiño lembra acompañala a presentar o libro en Esmelle, onde descubriron con ledicia que non existía outro topónimo igual en toda Galicia. Este feito reforzou a conexión da autora coa xeografía e a mitoloxía atlántica e céltica presentes na obra. Ademais da súa faceta literaria, Caamaño tivo unha importante traxectoria na Radio Galega, onde a oralidade era para ela "absolutamente fundamental". Alí desenvolveu unha intensa actividade sindical como delegada da CIG, chegando a ser representante do comité. A súa loita foi especialmente visible durante a crise do Prestige, onde defendeu con firmeza a necesidade de evitar a manipulación informativa. O seu compromiso social tamén se reflectiu no seu activismo feminista, que comezou desde moi nova. Nun artigo de 1990 titulado "Ser muller na radio", xa facía unha radiografía da situación das mulleres nun medio moi masculinizado. Foi militante de Mulleres Nacionalistas Galegas e participou activamente na creación da Marcha Mundial das Mulleres no ano 2000 contra a violencia de xénero e a pobreza. Para Pim Patinho, que coñeceu a Camaño en Santiago, recordala nestas charlas é "doloroso" pero á vez un acto de xustiza. "Estou indo a todos os sitios que me chaman porque penso que Begoña meréceo", afirma emocionada. A directora teatral lembra a súa amiga como unha persoa "moi alta, cun sorriso luminoso e moi agarimosa". Patiño comparte un fragmento dunha carta que a propia Caamaño escribiu imaxinando a súa morte, unha proba da súa sensibilidade e forza. A carta remata cunha petición que hoxe cobra máis sentido ca nunca e que a súa amiga lembra entre bágoas: "Cando xa non estea, a brindar por min, se considerades que o merezo".
Go to News Site