‘මගේ පියා මහින්ද රාජපක්ෂ පෞරාණික සමබරතාව නූතන ප්‍රතිපත්තිවලට එක් කළ නායකයෙක්..’- නාමල් හොංකොංහි සැරටම කඩුව වනයි

ලෝකයේ උදාරතම ජයග්‍රහණ අත්කර ගත හැක්කේ සංවර්ධනය සහ ශිෂ්ටාචාරය අතර මනා සුසංයෝගයක් පවතින විට පමණක් බව ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ මහතා ප්‍රකාශ කළේය. ඒ මහතා මේ බව අවධාරණය කළේ (15) හොංකොංහිදී පැවති '2026 ආසියානු සංස්කෘතික පොදු සුභසාධන සංසදය' (Asian Cultural Public Welfare Forum) ඇමතීමට එක්වෙමිනි. ආසියානු කලාපයේ සංස්කෘතික අනන්‍යතාව රැකගනිමින් නවීන තාක්ෂණය හා සංවර්ධනය කරා යන ගමන පිළිබඳව ඔහු මෙහිදී දීර්ඝ වශයෙන් කරුණු පැහැදිලි කළේය. එහිදී වැඩිදුරටත් අදහස් දැක්වූ නාමල් රාජපක්ෂ මහතා මෙසේද පැවසීය: "අද වන විට ලෝක ආර්ථිකයේ ගාමක බලවේගය පෙරදිග දෙසට ගමන් කරමින් තිබෙනවා. 2030 වන විට ගෝලීය දළ දේශීය නිෂ්පාදිතයේ වර්ධනයෙන් 60%කට ආසන්න ප්‍රමාණයක් ආසියාවෙන් බලාපොරොත්තු විය හැකියි. නමුත් අප හමුවේ ඇති ප්‍රධානතම ප්‍රශ්නය වන්නේ, අප ලඟා කරගන්නා මෙම සංවර්ධනය තුළ අපේ ශිෂ්ටාචාරාත්මක අනන්‍යතාව රැකෙන්නේද යන්නයි. තාක්ෂණය මනුෂ්‍යත්වයට සේවය කළ යුතු මිස මනුෂ්‍යත්වය අභිභවා නොයා යුතුයි. වසර දෙදහසකට අධික ලිඛිත ඉතිහාසයක් ඇති ශ්‍රී ලංකාව, සංවර්ධනය සහ සොබාදහම අතර තිබිය යුතු සබැඳියාව ලොවටම ඔප්පු කළ රටක්. 'වැවයි, දාගැබයි, ගමයි, පන්සලයි' යන සංකල්පය හරහා අපේ මුතුන් මිත්තන් තිරසාර සංවර්ධනය ක්‍රියාවෙන් පෙන්වා දුන්නා. මගේ පියා වන මහින්ද රාජපක්ෂ මහතා මෙම පෞරාණික සමබරතාව නූතන ප්‍රතිපත්තිවලට එක් කළ නායකයෙක්. ඔහු අහස සිඹින ගොඩනැගිලි හා නවීන වරායන් ඉදි කරන අතරතුරම, ග්‍රාමීය ජනතාව සවිබල ගැන්වීම සහ සංස්කෘතික වටිනාකම් සුරැකීම කෙරෙහි නිරන්තර අවධානය යොමු කළා. අද අප ඩිජිටල් අසමානතාව සහ දේශගුණික විපර්යාස වැනි අභියෝග රැසකට මුහුණ දී සිටිනවා. ධම්මපදයේ සඳහන් වන පරිදි, අප්‍රමාදීව හා අවධානයෙන් කටයුතු කිරීම ජයග්‍රහණයේ මාවතයි. අපේ සංවර්ධනය ආත්මය විනාශ කරගන්නා ගමනක් නොවිය යුතුයි. කෘතිම බුද්ධිය සහ නවීන තාක්ෂණය සුභසාධනය සඳහා යොදා ගත යුතු අතරම, එමගින් සමාජීය හුදකලා වීමක් සිදු නොවීමට වගබලා ගත යුතුයි. මගේ පරම්පරාවේ තරුණ නායකයින්ට පැවරී ඇති වගකීම වන්නේ මැතිවරණ ජයග්‍රහණ ගැන සිතීම පමණක් නොව, ඉදිරි පරම්පරා ගණනාවක් වෙනුවෙන් තිරසාර ලෝකයක් ඉතිරි කිරීමයි. ආසියාව හුදෙක් ආර්ථික වශයෙන් වර්ධනය වනවාට වඩා, සදාචාරාත්මක සහ සංස්කෘතික නායකත්වයක් ලොවට සැපයිය යුතුයි. ශිෂ්ටාචාරයක ශක්තිය මනිනු ලබන්නේ හමුදා බලයෙන් නොව, එහි වැසියන් භුක්ති විඳින ජීවන තත්ත්වය සහ මානුෂීය ගෞරවය මත බව මගේ විශ්වාසයයි." මේ පුවත තව අයට බලන්න Facebook එකට Share කරන්න WhatsApp එකට Share කරන්න

Go to News Site