Fréttastofa RÚV
Búist er við að hagvöxtur dragist saman um 0.3 prósent í ríkjum Evrópusambandsins á þessu ári, og að verðbólga verði um 3.1 prósent - um prósentustigi hærri en áður hafði verið spáð. Þetta kemur fram í efnahagsspá framkvæmdastjórnar ESB sem birt var í Brussel í morgun. Átökin í Mið-Austurlöndum og hækkandi orkuverð í kjölfarið eru sögð vera helsta ástæðan fyrir þessari þróun; þótt orkukrísan í kjölfar allsherjarinnrásar Rússa í Úkraínu vorið 2022 hafi leitt til þess að ríki Evrópu séu nú minna háð jarðefnaeldsneyti, þá hefur hækkandi verð á gasi og olíu þegar haft áhrif. Í fréttatilkynningu framkvæmdastjórnarinnar í morgun segir að innan nokkurra vikna frá því átökin í Mið-Austurlöndum hófust, hafi verðbólga byrjað að þokast uppá við vegna hækkandi verðs á eldsneyti. „Snörp hækkun þýðir aukin útgjöld heimila og aukinn kostnaður fyrirtækja, sem þýðir að tekjur streyma frá Evrópu til þeirra ríkja sem flytja út orku,“ segir í tilkynningunni. Aukið álag á opinber útgjöld Samkvæmt spá framkvæmdastjórnarinnar er gert ráð fyrir að orkukrísan hafi einnig neikvæð áhrif á opinber fjármál. Búist er við að halli á ríkissjóðum aðildarríkjanna hækki (að meðaltali) úr 3.1 prósentum í 3.6 prósent á næsta ári; það endurspeglar hægari gang í efnahagslífinu, auknar vaxtagreiðslur, útgjöld til að draga úr áhrifum hækkandi orkuverðs á heimili og fyrirtæki og aukin útgjöld til varnar- og öryggismála. Hlutfall skulda og þjóðarframleiðslu hækkar einnig samkvæmt spánni, úr 82.8 prósent í fyrra, í 84.2 prósent á þessu ári og 85.3 prósent 2027.
Go to News Site