Telegrafi
Përzgjedhësi i kombëtares së meshkujve të Shteteve të Bashkuara, Mauricio Pochettino, është takuar me përfaqësues të klubit italian Milan lidhur me postin vakant të trajnerit kryesor. Takimi është zhvilluar javën e kaluar, para kampit përgatitor të SHBA-së për Kupën e Botës, kanë bërë të ditur burime për The Athletic. 54-vjeçari është identifikuar si një nga kandidatët e mundshëm për të pasuar Massimiliano Allegrin, i cili u largua nga klubi në fillim të kësaj jave, ndërsa Andoni Iraola, trajneri që është lojtar i lirë pas largimit nga Bournemouth, konsiderohet një kandidat kryesor. Milani po zhvillon një kërkim të gjerë, me synimin për ta realizuar ambicien e pronarëve për ta ringjallur klubin dhe për ta kthyer atë jo vetëm në një forcë sërish, por edhe në një nga projektet më tërheqëse në futbollin botëror. Interi shpërthen ekonomikisht, kap vlerën marramendëse prej 2.1 miliardë eurosh - lë pas Juventusin dhe Milanin Argjentinasi e nisi karrierën e trajnerit te Espanyol në Spanjë, ku kishte kaluar nëntë vjet si lojtar në dy periudha, përpara se të transferohej në Angli me një aventurë 16-mujore në krye të Southamptonit në Ligën Premier. Më pas, Pochettino mori drejtimin e Tottenhamit, të cilin e konsolidoi si klub të “top 4” në elitën angleze dhe e udhëhoqi deri në finalen e Ligës së Kampionëve në vitin 2019, për t’u larguar më pak se gjashtë muaj më vonë. Ai vijoi te Paris Saint-Germain, ku fitoi tre trofe, përfshirë titullin e Ligue 1 në sezonin 2021/22. Pochettino u shkarkua në fund të atij sezoni dhe më pas drejtoi Chelsean në sezonin 2023/24, para se të kalonte në futbollin e kombëtareve me SHBA-në në shtator 2024. Një kalim i mundshëm te Milani do ta ribashkonte Pochettinon me sulmuesin e SHBA-së, Christian Pulisic, ndërsa bashkëlojtari i tij te kombëtarja, Yunus Musah, është gjithashtu nën kontratë me klubin, por këtë sezon e kaloi në huazim te Atalanta./ Telegrafi /
Go to News Site