Aðalsamningamaður Írana kveðst vantreysta Bandaríkjastjórn á sama tíma og forsetinn herðir skilyrði

Mohammad Bagher Ghalibaf, þingforseti og aðalsamningamaður Írana, segist hvorki treysta bandarískum stjórnvöldum né vera reiðubúinn að staðfesta samkomulag við þau nema öll ríkisréttindi Írans verði tryggð. Þessi orð Ghalibafs sýna þá miklu gjá sem enn er milli ríkjanna, sem hann lét falla í sjónvarpsávarpi eftir að þau tíðindi bárust að Donald Trump Bandaríkjaforseti hefði sent Írönum mjög ákveðið orðaðar tillögur að friðarsamkomulagi. Tasnim-fréttaveitan segir samningsdrög hafa gengið á víxl milli samningamanna sem reglulega hefðu lagt til breytingar. Megináhersla Trumps er á að Íranar komi sér ekki upp kjarnavopnum og opnun siglingaleiðarinnar um Hormússund, sem Íranar hafa nánast lokað frá því stríðið hófst. Íranskir ráðamenn hafa til þessa krafist þess að látið verði af frystingu tólf milljarða dala fjármunaeigna og að Líbanon verði hluti samkomulagsins Íranski utanríkisráðherrann Abbas Araghchi segir allt vera tómar vangaveltur þar til endanlegur samningur næst. Allar tilraunir til að breyta samkomulaginu gætu dregið formleg endalok stríðsins í Mið-Austurlöndum á langinn og þar með opnun Hormússunds. Vopnahléð hefur haldið að mestu þrátt fyrir að árásir hafi verið gerðar á báða bóga.

Go to News Site