Բարեգործական կազմակերպությունները ուխտագնացություն են կատարել Տաթեւ

Երեւան: Մեդիամաքս: Արդեն երրորդ տարին է՝ մայիսի վերջին շաբաթ օրը, Հայ Առաքելական Եկեղեցու օրհնությամբ, Տաթեւի ուխտագնացությունը համախմբում է հայկական բարեգործական, զարգացման եւ համայնքային մի շարք կառույցների, ուխտավորների եւ հոգեւորականների՝ աղոթքի, հոգեւոր նորոգման, հիշողության եւ բարի գործի շուրջ։ Նախաձեռնությունը մեկնարկել է Ռուբեն Վարդանյանի հիմնադրած «Մենք ենք մեր սարերը» զարգացման գործակալության կողմից եւ ձեւավորվել որպես համագործակցության հարթակ, որտեղ հոգեւոր ճանապարհը շարունակվում է համայնքին, Սյունիքին եւ մարդկանց ուղղված գործնական աջակցությամբ։ Այս տարի Տաթեւի ուխտագնացության շուրջ համախմբվել էին «Մենք ենք մեր սարերը» զարգացման գործակալությունը, ՀԲԸՄ-ը, Թուֆենկյան հիմնադրամը, «Ազնավուր» հիմնադրամը, Հայ օգնության միությունը (ՀՕՄ), «Օրրան» բարեգործական ՀԿ-ն, Տաթեւի համայնքապետարանը, «Էյ-Թի-Փի» բարեգործական հիմնադրամը (Armenia Tree Project), Հ. Հովնանյան ընտանեկան հիմնադրամը, IDeA հիմնադրամը, «ՏաԹեւեր» ճոպանուղին եւ «Տաթեւի վերածնունդ» հիմնադրամը։ Ուխտագնացությունն անցկացվեց «Ճանապարհ դեպի հավատ, միասնություն եւ արարում» խորագրով։ Ուխտավորները դեպի Տաթեւ շարժվեցին երեք տարբեր երթուղիներով՝ խոնարհվելով Սյունիքի սրբավայրերում`Որոտնավանքում, Սվարանցի Հազարափրկիչ եւ Հին Հալիձորի Սուրբ Մինաս եկեղեցիներում։ Բոլոր ուխտավորները միավորվեցին Տաթեւի Սուրբ Պողոս–Պետրոս տաճարում, որտեղ կատարվեց միասնական աղոթք՝ Սյունյաց թեմի առաջնորդ Գերաշնորհ Տեր Մակար եպիսկոպոս Հակոբյանի օրհնությամբ։ Աղոթք բարձրացվեց առ Աստված՝ պատերազմներում զոհվածների հոգիների հանգստության, Ադրբեջանում պահվող հայ գերիների շուտափույթ ազատության եւ հոգեւոր արժեքների շուրջ համախմբման համար։ «Մեր ազգի բարերարներից մեկը գերության մեջ է, մեր ամբողջ էլիտան գերության մեջ է մեր անհավատության ու անտարբերության պատճառով։ Մեկս մյուսին չսիրելու արդյունքում ամեն ինչ կորցրել ենք եւ կորցնելու ենք, եթե ուշքի չգանք եւ չսթափվենք: Առաջնային է բոլորիս համար, որ աղոթենք մեր միասնականության համար, մեր ամբողջականության համար, որովհետեւ ինչքան սեւերի եւ սպիտակների բաժանվենք, այդքան կործանվելու ենք», – նշեց Գերաշնորհ Տեր Մակար եպիսկոպոս Հակոբյանը։ Ուխտագնացության համակազմակերպիչները կարեւորեցին միասնության գաղափարը՝ ընգծելով, որ Տաթեւի շուրջ ձեւավորված համագործակցությունը ոչ միայն հոգեւոր, այլեւ համազգային նշանակություն ունի: «Միությունը՝ զորություն է, եւ մենք բոլորս պետք է միասին աշխատենք մեր ցանկացած արդյունքների ուղղությամբ՝ ունենալու հզոր Հայաստան, Սփյուռքի եւ Հայաստանի միջեւ հզոր կապեր ստեղծելու կամ ամրապնդելու»,– ասաց ուխտագնացության համակազմակերպիչ, ՀԲԸՄ հայաստանյան մասնաճյուղի նախագահ Վազգեն Յակուբյանը: «15 բարեսիրական կազմակերպություն միացավ այս ուխտագնացությանը, որպեսզի մեր ժողովուրդը միավորվի, աստվածավախությունը ավելի շեշտվի իրենց մեջ եւ իրենք նվիրվեն հայրենիքի պաշտպանությանը եւ հզորացմանը՝ ինչ դժվարության էլ որ հանդիպեն»,– նշեց ՀՕՄ Հայաստանի շրջանային վարչության ատենապետուհի Մարո Քեշիշյանը։ «Մենք ենք մեր սարերը» զարգացման գործակալության գլխավոր տնօրեն Գրիգորի Մարտիրոսյանի խոսքով, «այս ուխտագնացությունը ցույց է տալիս, որ երբ մարդիկ եւ կազմակերպությունները միավորվում են ընդհանուր արժեքների շուրջ, աղոթքը կարող է վերածվել գործողության, իսկ հիշողությունը՝ ապագա կերտելու ուժի»։ Թուֆենկյան հիմնադրամի ծրագրով Սվարանցում կառուցվող նոր թաղամաս ուխտավորների այցելությունը ցույց տվեց, թե ինչպես է սրբավայրի կողքին ձեւավորվում նոր կյանք: «Կարծում եմ, որ գյուղը նոր շունչ կստանա արցախցիների վերաբնակեցումից, որովհետեւ հնարավորություն կլինի գյուղում պահպանել եւ դպրոցը, եւ իրականացնել տարբեր սոցիալ-տնտեսական ծրագրեր»,– ասաց Թուֆենկյան բարեգործական հիմնադրամի ներկայացուցիչ Արամ Ոսկանյանը։ Ուխտագնացությունը նաեւ Արցախի հոգեւոր ժառանգության մասին բարձրաձայնելու առիթ էր։ Մասնակիցները կրում էին Արցախի սրբավայրերի պատկերներով շապիկներ՝ ընդգծելով դրանց պաշտպանության հրատապ անհրաժեշտությունը։ «Տաթեւի այս ուխտագնացությունը մեզ համար նաեւ աղոթք էր Արցախի սրբավայրերի համար եւ կոչ՝ չմոռանալ ու պաշտպանել մեր հոգեւոր ժառանգությունը»,–ասաց ուխտագնացությանը մասնակցած արցախցի Արմեն Մաղաքելյանը։ Յուրաքանչյուր տարի ուխտագնացությունն ունենում է համայնքին աջակցելու որեւէ նախագիծ։ Այս տարի ուխտագնացության համայնքային նպատակը Տաթեւի երեխաների համար «Կենդանի փեթակ» կրթական խաղահրապարակի ստեղծումն է։

Go to News Site