„Þarna er verið að lýsa gríðarlegu álagi og þungu starfsumhverfi sem þarf að taka á“

Mjög misjafnt álag er á starfsfólki grunnskóla og mest mæðir á umsjónarkennurum samkvæmt niðurstöðum nýlegrar skýrslu sem unnin var fyrir Samtök sveitarfélaga á höfuðborgarsvæðinu. Einn af hverjum tíu umsjónarkennurum telur sig búa við þrúgandi álag. Mjöll Matthíasdóttir, formaður Félags grunnskólakennara, segist fagna skýrslunni en segir ekkert koma henni á óvart við niðurstöður hennar. „Því miður, því þarna er verið að lýsa gríðarlegu álagi og þungu starfsumhverfi sem þarf að taka á,“ segir hún. Aukin, oft krefjandi, samskipti við foreldra Í skýrslunni var neikvæð umræða um skólastarf í samfélaginu nefnd sem veigamikil ástæða álags á starfsfólk og færi hún vaxandi. Þá hefði nemendahópurinn orðið fjölbreyttari, hegðunarvandi vaxið og þyngri málum fjölgað. Mat viðmælenda var að þátttaka skólanna í uppeldi hefði aukist til muna á undanförnum árum. Breytingar í uppeldi á mörgum heimilum hefðu aukið streitu auk þess sem samskipti við foreldra, sem oft væru krefjandi, hefðu aukist mikið. Þá gerðu foreldrar nú meiri kröfur um alls kyns þjónustu og ráðgjöf en áður. Neikvæðri umræðu haldið á lofti Mjöll segir að aukin krafa um að skólinn sinni uppeldi lendi mest á umsjónarkennurum. Þá séu þeir í mestum samskiptum við foreldrana. Til að ráða bót á ástandinu segir Mjöll að allir þurfi að leggjast á eitt. „Og það er annar þáttur sem skorar nú enn hærra en samskiptin við foreldra og það er neikvæð umræða um skólastarfið.“ Mjöll segir að þar þurfi samfélagið allt og einkum fjölmiðlar að líta í eigin barm. „Við höldum neikvæðri umræðu um skólastarf alltof gjarnan á lofti. Þetta er sú umræða sem börnin heyra og ekki er það að fara að hjálpa til við álagið í skólanum. Það er víða alveg frábært starf unnið og við þurfum að halda því meira á lofti og segja frá því sem vel er gert og vel gengur.“

Go to News Site