Մեկ ծառ, մեկ կյանք. ՀՖՀՀ եւ «Միասին» հիմնադրամի համատեղ ծառատունկը Արփի լճի մոտ

Հայաստանում ֆրանսիական համալսարանը (ՀՖՀՀ) 25-ամյակի միջոցառումների շրջանակում եւ COP17-ին ընդառաջ «Միասին» հիմնադրամի հետ համատեղ ծառատունկ է իրականացրել Շիրակի մարզում՝ Արփի լճի մերձակայքում։ Բնապահպանական նախաձեռնությունը համախմբել է համալսարանի ուսանողներին, ՀՖՀՀ-ի եւ «Միասին» հիմնադրամի ղեկավարության ներկայացուցիչներին, տեղի բնակիչներին, ինչպես նաեւ՝ Շիրակի մարզի գյուղատնտեսության եւ բնապահպանության վարչության ներկայացուցիչներին։ «Մեկ ծառ, մեկ կյանք» խորագրով նախաձեռնության ընթացքում մասնակիցները տնկել են 25 եղեւնի եւ կովկասյան սոճի՝ խորհրդանշելով համալսարանի 25-ամյակը, բնության պահպանության կարեւորությունն ու երկու կառույցների միջեւ երկարաժամկետ համագործակցությունը։ Մեդիամաքսի հետ զրույցում ծառատունկի կազմակերպիչները եւ մասնակից ուսանողները կիսվել են իրենց տպավորություններով եւ շրջանի զարգացման հետագա ծրագրերով։ Ուսանողներին ծանոթացնել Հայաստանի շրջաններին՝ խթանելով դրանց զարգացումը Սալվա Նակուզի, Հայաստանում ֆրանսիական համալսարանի ռեկտոր Այս ծառատունկի նման նախաձեռնությունները կարեւոր են ուսանողների քաղաքացիական պատասխանատվության ձեւավորման տեսանկյունից։ Մենք դուրս ենք գալիս ակադեմիական շրջանակից, որպեսզի իրականացնենք քաղաքացիական պատասխանատվության գործողություն։ Այսպես նաեւ ավելի լավ ենք ճանաչում մեր ուսանողներին։ Բացահայտում, որ ունենք ուսանողներ, որոնք կարողանում են ծառ տնկել, հասկանում են այգեգործությունից։ Այս ծրագրի կարեւոր բաղադրիչներից մեկն էլ ուսանողներին Հայաստանի տարբեր շրջաններին ծանոթացնելն է։ Ցավոք, դեռ կան վայրեր, որոնք շատերս լավ չենք ճանաչում, բայց դրանք ունեն իսկապես խոստումնալից ապագա։ Մեր ուսանողները հետագայում կարող են դառնալ նախաձեռնողներ, ձեռնարկատերեր, աշխատել տարատեսակ ասոցիացիաներում, եւ ճանաչելով սեփական երկիրը, իմանալով եղած հնարավորությունների մասին՝ կարող են մասնակցել նման շրջանների զարգացմանը։ Ինչ վերաբերում է «Միասին» հիմնադրամի հետ մեր համագործակցությանը՝ այն արդեն տարիների պատմություն ունի։ Հիմնադրամը հյուրընկալում է ՀՖՀՀ ուսանող փորձնակներին Շվեյցարիայում։ Այստեղ եւս մեր նպատակը նույնն է՝ երիտասարդներին հնարավորություն տալ զարգացնել իրենց հմտությունները, բացահայտել նաեւ արտասահմանում եղած մասնագիտական կարողությունները՝ հետագայում դրանք Հայաստանում կիրառելու նպատակով։ «Միասին» հիմնադրամի հիմնադիր նախագահ Աստղիկ Մառանջյանը նույնիսկ իր տանն է հյուրընկալում մեր ուսանողներին։ Այնպես որ, երբ իմացանք, որ հիմնադրամն Արփի լճի տարածքում նման նախագիծ է իրականացնում, ցանկություն հայտնեցինք միանալ։ Այս միջոցառումը խորհրդանշական է նաեւ, քանի որ իրականացվել է Կենսաբազմազանության միջազգային օրը եւ համընկնում է Հայաստանում կենսաբազմազանության տարվան նվիրված միջոցառումների հետ։ «Հայկական Սիբիրը» դարձնել «հայկական Լապլանդիա» Աստղիկ Մառանջյան, «Միասին» հիմնադրամի հիմնադիր նախագահ «Միասին» հիմնադրամի եւ Հայաստանում ֆրանսիական համալսարանի համագործակցությունը սկսվել է 2018թ.-ին, երբ սկսեցինք Շվեյցարիայում ընդունել ՀՖՀՀ լավագույն ուսանողներին՝ իրենց ուսումնական պրակտիկայի անցկացման համար։ Թե՛ «Միասին» հիմնադրամում, թե՛ ՄԱԿ-ի տարբեր գրասենյակներում, ինչպես նաեւ՝ Հայաստանի դեսպանությունում։ Սա շատ կարեւոր քայլ էր, որը դարձավ մեր ռազմավարական համագործակցության սկիզբը։ Այս տարի արդեն ընդունեցինք ՀՖՀՀ ուսանողների 7-րդ սերնդին։ Այս հաջողված համագործակցության արդյունքներով էլ առաջացավ գաղափար, որ ՀՖՀՀ եւ հիմնադրամի համատեղ ջանքերով կարող ենք իրականացնել ծառատունկ՝ համալսարանի 25-ամյակի կապակցությամբ։ Վայրի ընտրությունը պատահական չէր. Արփի լճի շրջակայքն ազգային պարկ է եւ շատ կարեւոր նշանակություն ունի Հայաստանի համար, այդ թվում՝ ռազմավարական դիրքի պատճառով։ Լիճը Հայաստանի, Թուրքիայի եւ Վրաստանի սահմանների հատման մերձակայքում է եւ, ցավոք, տեղի գյուղերը բավականին վատ սոցիալական պայմաններում են ապրում։ Մեզ համար կարեւոր էր այս տարածք հնարավորինս շատ մարդ հրավիրել թե՛ արտերկրից, թե՛ Երեւանից, որպեսզի նրանք նույնպես իրենց ներդրումն ունենան շրջանի զարգացման գործում։ Հայաստանում ֆրանսիական համալսարանի հետ ծառատունկի արդյունքում տնկել ենք խորհրդանշական 25 ծառ՝ ի պատիվ համալսարանի 25-ամյակի։ Ծառատունկին մասնակցել է մոտ 25 ուսանող եւ համալսարանի ղեկավարությունը՝ ռեկտոր Սալվա Նակուզիի գլխավորությամբ։ Քանի որ լիճը 2000 մ բարձրության վրա է, ծառատունկի համար ընտրել ենք ցրտադիմացկուն ծառեր՝ եղեւնիներ եւ կովկասյան սոճիներ։ Ծառերի հետագա խնամքի վերաբերյալ պայմանավորվել ենք տեղում մեր հիմնադրամների շահառու երիտասարդների հետ, որոնք վստահաբար լավագույնս հոգ կտանեն դրանց մասին։ Կարեւոր է, որ սա մեր մեծ ծրագրի առաջին քայլն է, քանի որ նախատեսում ենք հետագայում այս տարածքում ցրտադիմացկուն ծառերի բուսաբանական այգի հիմնել։ Շիրակի մարզի այս հատվածը համարվում է «հայկական Սիբիր» եւ Հայաստանի բնակչության մոտ 95 տոկոսն այս վայրում երբեք չի եղել։ Մեզ համար մարտահրավեր է «հայկական Սիբիրը» դարձնել «հայկական Լապլանդիա» եւ բոլորը՝ թե՛ մերձակա համայնքների բնակիչները, թե՛ երեւանցիները պետք է մասնակցեն այս գործընթացին։ Եվս մեկ անգամ շնորհակալ եմ Հայաստանում ֆրանսիական համալսարանին՝ առաջին քայլն անելու համար։ Այս միջոցառմանը մասնակցած ՀՖՀՀ ուսանողները հետագայում կկարողանան ասել, որ կանգնած են Արփի լճի մերձակայքում ստեղծվող բուսաբանական այգու հիմքում։ «Եթե չկա բնություն՝ չկա կյանք» Տիգրան Վարդանյան, ՀՖՀՀ Ուսանողական խորհրդի նախագահ Նման նախաձեռնությունները շատ ենք կարեւորում եւ ցանկանում ենք, որ դրանք դառնան ավանդույթ։ Ծառ տնկելով՝ կատարում ենք մեր ներդրումն ավելի կանաչ եւ առողջ միջավայր ունենալու համար։ Ցավոք, մարդ-բնություն կապը մեր օրերում շատ է պակասել, եւ հենց այս իրավիճակում է առավել կարեւոր ճանաչել, սիրել ու պահպանել շրջակա միջավայը։ Եթե չկա բնություն՝ չկա կյանք, սա մեր գոյության հիմքն է։ Կարելի է ասել, որ միջոցառման ընթացքում մասնակից յուրաքանչյուր ուսանող տնկել է իր ծառը։ Հստակ հաշվելը դժվար է, որովհետեւ աշխատանքը թիմային էր եւ յուրաքանչյուրն անում էր այն, ինչ իր մոտ առավել լավ է ստացվում՝ մեկը հողն էր փորումը, մյուսը՝ պատրաստում տնկին։ Սա եւս կարեւոր ցուցիչ է, որովհետեւ այսպիսով ուսանողները սովորում են իրենց ուժեղ կողմերը կիրառել ի օգուտ թիմի։ Շատ հետաքրքրիր էր նաեւ տեղի համայնքների բնակիչների հետ ծանոթությունը, շփումը: Նույնիսկ հաճելիորեն զարմացա՝ ինչքան արագ ընկերացան մեզ հետ եւ սկսեցին ասել-խոսել (ժպտում է – հեղ.) ։ Որպես Հայաստանում ֆրանսիական համալսարանի ՈՒԽ նախագահ կարող եմ ասել, որ նման արտահամալսարանական միջոցառումները շատ կարեւոր են յուրաքանչյուր ուսանողի համար։ Դրանք շարժիչ ուժ են եւ մոտիվացնում են լինել լավ ուսանող, ակտիվ կյանք վարող երիտասարդ եւ պատասխանատու քաղաքացի։ «Անկախ անձրեւոտ եղանակից՝ օրն անցավ շատ ջերմ մթնոլորտում» Նոյ Բզնունի, ՀՖՀՀ Կառավարման ֆակուլտետի առաջին կուրսի ուսանող, ծառատունկի մասնակից Արփի լճի մերձակայքում ծառատունկի մասին իմանալուց անմիջապես հետո որոշեցի մասնակցել։ Առաջին հերթին, որովհետեւ ծնվել եւ մեծացել եմ Շիրակի մարզում եւ ինձ համար շատ կարեւոր էր թեկուզ փոքրիկ մասնակցություն ու ներդրում ունենալ այս տարածաշրջանի զարգացման մեջ։ Շատ գրավիչ էր նաեւ թիմային աշխատանքը։ Օրը շատ հագեցած էր՝ լի նոր ծանոթություններով եւ դրական էմոցիաներով։ Նախ մեկնեցինք Գյումրի, ինչից հետո շարժվեցինք Արփի լիճ, որտեղ տեղացիները մեզ շատ լավ դիմավորեցին՝ երգ ու պարով (ժպտում է – հեղ.)։ Ճիշտ է, եղանակը փոքր-ինչ ամպամած եւ անձրեւոտ էր, բայց օրն անցավ շատ ջերմ մթնոլորտում։ Կարծում եմ՝ ծառը կյանքի կարեւորագույն խորհրդանիշներից է։ Այն մեզ տալիս է թթվածին, ստվեր, փոխանցում գեղեցկություն եւ օգնում պահպանել շրջակա միջավայրը։ Կարծում եմ՝ յուրաքանչյուրիս տնկած նույնիսկ մեկ ծառը շատ կարեւոր դեր ունի։ Որպես ՀՖՀՀ ուսանող՝ շնորհակալ եմ իմ համալսարանին նման միջոցառումների կազմակերպման համար, քանի որ կարծում եմ՝ ուսանողական կյանքը չի կարող սահմանափակվել միայն դասերով։ Լինելով ՀՖՀՀ Ուսանողական խորհրդի անդամ՝ ինքս նպատակ ունեմ առաջիկայում արշավ կազմակերպել Դիմաց լեռ՝ համալսարանական ընկերների հետ բուհից դուրս ժամանակ անցկացնելու, բնությանն ավելի մոտ լինելու նպատակով։ Յանա Շախրամանյան

Go to News Site