Fréttastofa RÚV
Benedikt Halldórsson, fagstjóri jarðskjálftavár á Veðurstofu Íslands, telur ljóst að jarðskjálfti sem varð í dag í Hengli tengist flekahreyfingum og að ekki séu neinar vísbendingar um kvikusöfnun á svæðinu. Jarðskjálftinn var af stærðinni 4,5 og varð korter fyrir tvö í Henglinum vestan við Húsmúla. Hann fannst vel á Suðvesturlandi, meðal annars í Hveragerði, á Selfossi og á höfuðborgarsvæðinu. Veðurstofu bárust einnig tilkynningar um að hann hefði fundist á Akranesi og undir Eyjafjöllum. Spennulosun hafi orðið Dreifing eftirskjálfta og brotlausnir stærstu jarðskjálftanna benda til þess að um sniðgengisskjálfta sé að ræða á norður-suður misgengi á brotabelti Suðurlands og Reykjaness. „Þetta eru svona flekahreyfingar sem hegða sér þannig að þær hegða sér eins og við erum vön að sjá á norður-suður sprungum þarna á brotabeltinu.“ Benedikt Halldórsson telur ekki að frekari hætta stafi af. Engar vísbendingar séu um kvikusöfnun á svæðinu. Mikil spenna hefur byggst upp á svæðinu og Benedikt telur að mögulega hafi þarna orðið spennulosun. Það hefur verið talað um að þarna sé spenna að safnast upp, er þetta þá mögulega spennulosunin sem fólk er búið að vera að bíða eftir? „Ég held að miðað við það sem við erum búin að sjá í dag þá bendi allt til þess,“ segir Benedikt. Jarðskjálftahrina hófst á svæðinu upp úr klukkan 7 í gærmorgun, 31. maí. Síðan hrinan hófst hafa rúmlega 700 jarðskjálftar mælst. Búast má við eftirskjálftavirkni á svæðinu næstu daga.
Go to News Site