Ætlar að leita til evrópskra dómstóla falli málið honum ekki í hag

Ivan Nicolai Kaufmann, kaupsýslumaður og aðaleigandi Vélfags, segir að verði niðurstaða í máli Vélfags gegn ríkinu neikvæð fyrir fyrirtækið og hann muni hann leita til evrópskra dómstóla. Aðalmeðferð í máli Vélfags gegn íslenska ríkinu hófst í Hæstarétti í dag. Tekist er á um þvingunaraðgerðir gegn Vélfagi vegna meintra tengsla við rússneska skuggaflotann. Vélfag hefur krafist þess að ákvörðun Arion banka að frysta fjármuni félagsins verði snúið við. Þá hefur einnig verið tekist á um synjun utanríkisráðuneytisins á því að Ivan Nicolai Kaufmann fái að setjast í stjórn félagsins en hann er meirihlutaeigandi í félaginu. Kaufmann sagðist ekki geta tjáð sig mikið um aðalmeðferðina eftir að henni lauk þar sem hún hefði öll farið fram á íslensku. Hann vakti þó athygli á því að dómarar hefðu spurt spurninga á meðan hún fór fram, nokkuð sem hann taldi góðs viti. Aðspurður hver næstu skref verða ef málið fellur fyrirtækinu í hag var Kaufmann ómyrkur í máli. „Það eru fjörutíu störf sem hafa glatast og fjörutíu fjölskyldur misstu viðurværi sitt. 30 ára gamalt íslenskt fyrirtæki er eyðilagt svo getur þú sagt mér hvað gæti talist hagstæð niðurstaða í þessu máli fyrir mig?,“ spyr Kaufmann. Þá var hann einnig nokkuð skýr hver næstu skref yrðu ef niðurstaðan yrði honum og Vélfagi ekki hagfelld en það væri að leita til evrópskra dómstóla. Telur ákvörðun Arion banka mögulega ekki lögmæta Sigurður G. Guðjónsson, lögmaður Vélfags, flutti málið fyrir Hæstarétti í dag. Aðspurður hvort eitthvað nýtt hefði komið fram við aðalmeðferðina nefndi hann helst athugasemd varðandi það hvort reglugerðin, sem Arion banki notaðist við þegar ákveðið var að frysta fjármuni félagsins, hefði tekið gildi. „Hún er birt í b-deild Stjórnartíðinda 20 dögum eftir að bankinn tilkynnir frystinguna,“ segir hann, segir Sigurður sem ítrekar að ekki sé hægt að beita lögum sem ekki hafa verið birt. Hann segist ekki geta spáð fyrir um niðurstöðu málsins en taldi einnig að dómarar hefðu spurt athyglisverðra spurninga á meðan aðalmeðferðin fór fram. „En þú getur ekki ráðið í svipbrigði eða spurningar alveg,“ segir hann. Ein spurningin sem Skúli Magnússon hæstaréttardómari bar upp var hvers vegna málið hefði ekki upprunalega verið höfðað gegn Arion banka frekar en íslenska ríkinu. Ástæðan er bara sú að Arion banki fer ekki með neitt stjórnsýsluvald og hann hefur ekki rannsakað mál samkvæmt stjórnsýslulögum og á hann er bara lögð kvöð um að fylgjast með viðskiptavinum sínum og tilkynna stjórnvöldum um það ef eitthvað er grunsamlegt, segir Sigurður. „Síðan er lögð sú skylda á hann að fyrsta eignir ef því er að skipta en eftirleikurinn hlýtur alltaf að vera í höndum þess stjórnvalds sem fer með framkvæmd laganna almennt, segir Sigurður.

Go to News Site