Ազատություն
Քննչական կոմիտեն հայտնում է, որ քրեական հետապնդում է հարուցվել նախկին կրթության և գիտության նախարար Արմեն Աշոտյանի, ՊԵԿ նախկին նախագահ, ֆինանսների նախկին նախարար Գագիկ Խաչատրյանի, նրա որդու և ևս չորս անձի նկատմամբ։ Ըստ ՔԿ-ի՝ խոսքը Երևանի Բրյուսովի համալսարանին պատկանած անշարժ գույքի օտարման գործի մասին է։ Քննչական կոմիտեի պնդմամբ՝ 2009-2016 թվականներին կրթության և գիտության նախարարի պաշտոնը զբաղեցրած Արմեն Աշոտյանը, մի խումբ անձանց հետ, պաշտոնեական դիրքն օգտագործել է ծառայության շահերին հակառակ։ Արդյունքում, ըստ իրավապահների, պետության սեփականությունից դուրս է բերվել Երևանի Պուշկինի 38/1 հասցեում գտնվող 451 քմ մակերեսով անշարժ գույքն ու հողամասը։ Գույքի արժեքը գնահատում է ավելի քան 208 միլիոն դրամ։ Ըստ հաղորդագրության՝ այն հետագայում փոխանցվել է բարձրաստիճան պաշտոնատար անձի և նրա հետ փոխկապակցված անձի սեփականության ֆոնդ։ Իրավապահները պնդում են, որ գույքի ծագումը թաքցնելու նպատակով այն նախ ձևակերպվել է մեկ այլ անձի անունով, ապա 75 միլիոն դրամով գնվել և գրանցվել Գագիկ Խաչատրյանի որդու անվամբ։ Քրեական հետապնդումը հարուցվել է պաշտոնեական լիազորությունները չարաշահելու, դրան օժանդակելու, ինչպես նաև առանձնապես խոշոր չափերով փողերի լվացման և դրան օժանդակելու հոդվածներով։ ՔԿ-ն հայտնում է, որ ձերբակալելու որոշումներ են կայացվել։
Go to News Site
