Mediamax
Երեւան: Մեդիամաքս: Ռուսաստանի նախագահ Վլադիմիր Պուտինը հայտարարել է, որ «մենք կպահպանենք նորմալ հարաբերություններ Հայաստանի հետ՝ անկախ նրանից, թե ինչ ուղի կընտրի այդ երկիրը»։ «Ամեն ինքնիշխան պետության իրավունքն է՝ ընտրելու այն գործընկերներին ու ստանդարտները, որոնք նա համարում է առաջնային ու արժեքավոր՝ երկրի զարգացման, անկախության, ինքնիշխանության և, առաջին հերթին, տնտեսության ամրապնդման համար։ Մեզ մոտ ի՞նչն է մտահոգություն է առաջացել. Հայաստանում ընդունվել է ԵՄ-ին անդամակցության գործընթաց սկսելու մասին օրենք։ Ալեքսանդր Գրիգորեւիչը (Լուկաշենկոն-Մեդիամաքս) դրա վրա ուշադրություն հրավիրեց, ես նույնիսկ մոռացել էի դրա մասին։ Բայց Հայաստանը Եվրասիական տնտեսական միության անդամ է։ Քանի որ այդ օրենքն ընդունվել է, մենք խնդրում ենք հայ գործընկերներին հնարավորինս արագ որոշել, թե որ ուղղությամբ են շարժվելու։ Դրանից է կախված շուկաների կազմակերպումն ու կարգավորման ձեւը։ Մանավանդ որ վարչապետ Փաշինյանն ինքը բոլորովին վերջերս ասաց, որ անհրաժեշտ է համարում այդ հարցով հանրաքվե անցկացնել։ Մենք միայն մեկ խնդրանք ունենք՝ դա անել հնարավորինս շուտ, եւ վերջ։ Որեւէ պահանջ չունենք։ Մենք կպահպանենք նորմալ հարաբերություններ Հայաստանի հետ՝ անկախ նրանից, թե ինչ որոշում կկայացնի երկիրը»,- ասել է Վլադիմիր Պուտինը հունիսի 4-ին՝ միջազգային լրատվական գործակալությունների ղեկավարների հետ հանդիպման ժամանակ։ «Ռուսաստանն Հայաստանի խնդրանքով պնդել էր, որ վերջինս ընդունվի ԵԱՏՄ. մի շարք տնտեսական ցուցանիշներով Հայաստանը լիովին չէր համապատասխանում ընդհանուր համատեքստին։ Բայց հիմա նրանք որոշել են, որ պետք է մտածել այլ ուղղությամբ։ Մենք դեմ չենք՝ խնդրեմ։ Միայն խնդրում ենք հնարավորինս արագ որոշել եւ բաց քարտերով խաղալ ու վերջ։ Քաղաքական բնույթի մեծ խնդիր այստեղ չեմ տեսնում։ Տնտեսատեխնիկական խնդիրներ կան։ Հուսով եմ, դա էլ կհասկանանք»,- ավելացրել է Ռուսաստանի նախագահը։
Go to News Site