Kjarnaborunum á Eiðinu lokið og borinn fluttur í Landeyjar

Fréttastofa RÚV

Kjarnaborunum á Eiðinu lokið og borinn fluttur í Landeyjar

Kjarnaborunum vegna rannsóknar á fýsileika lagningar Eyjaganga á Eiðinu í Vestmannaeyjum er lokið. Þær hófust í apríl. Fréttamiðillinn Tígull greinir frá þessu og segir góðan gang hafa verið í rannsókninni og mikilvægum áfanga náð. Kjarnaborunin hafi skilað dýrmætri þekkingu á jarðlögunum sem nýtast muni við undirbúning og hönnun ganganna. Styrkleiki bergsins er rannsakaður og eins hve mikið vatn lekur í gegnum það. Starfsmenn Ræktunarsambands Flóa og Skeiða koma kjarnabornum, sem kallaður er Karl Prins, fyrir á Landeyjasandi við bæinn Kross, þar sem rannsóknum verður fram haldið. Heildarkostnaðurinn við borunina nemur um tvö hundruð milljónum króna. Það fjármagn fæst frá sveitarfélögum í Vestmannaeyjum og á Suðurlandi ásamt fyrirtækjum um land allt, samkvæmt upplýsingum Haraldar Pálssonar, framkvæmdastjóra Eyjaganga ehf. Haraldur sagði í apríl niðurstöður eiga að fást fyrir árslok, sem gegna lykilhlutverki við mat á hversu raunhæf veglagningin er. Þá verði hægt að ákveða hvort frekari rannsóknir séu forsvaranlegar.

Go to News Site

Google Play

App Store