Kajgana

Бразил без Нејмар посилен од Египет, Аргентина победи без Меси

Бразил без Нејмар посилен од Египет, Аргентина победи без Меси Александра Спасеска 07.06.2026 / 10:38 Фудбал Бразил го победи Египет со 2:1 во Охајо, поточно во Кливленд. Бразилците рано поведоа со голот на играчот од средниот ред Бруно Гимараеш во 7-та минута, а Египет брзо израмни преку Зика во 11-та минута. Решавачкиот гол го постигна Ендрик од Реал во 52-та минута. Селекторот на Бразил, Карло Анчелоти, го искористи натпреварот за ротација и проверка на формата на своите играчи пред почетокот на Светското првенство. Бразил на тој начин ги заврши подготовките со победа, иако повредата на десниот бек Весли е загрижувачка, додека Нејмар не отпатува во Кливленд за да се опорави од повреда на листот. Аргентина го победи Хондурас со 2:0 во Тексас во претпоследниот загревачки натпревар пред Светското првенство. Актуелните светски шампиони доминираа во натпреварот, со головите на Лаутаро Мартинес и Џулијано Симеоне. Најголемата ѕвезда, Лионел Меси, беше на клупата. Тренерот Лионел Скалони го поштеди за да може целосно да се опорави од повредата на тетивата што ја заработи на 24 мај и да биде подготвен да го започне натпреварувањето. Натпреварот, кој не беше многу возбудлив, оживеа во 37-та минута кога Кристофер Мелендес го собори Николас Таљафико во шеснаесетникот. Пеналот го изведе напаѓачот на Интер, Лаутаро Мартинес, кој упати прецизен удар во левиот агол и ѝ даде водство на Аргентина. Развеселиот Мартинес беше клучен и во вториот гол во 54-та минута. По неговата интелигентна асистенција со петицата, напаѓачот на Атлетико Мадрид, Џулијано Симеоне, го зголеми резултатот на 2:0, победувајќи го голманот на Хондурас, Едрик Менхивар. Супериорноста на Аргентинците најдобро се покажува со фактот дека Хондурас едвај успеа да влезе во половината од теренот на противникот во второто полувреме. Аргентина можеше да слави поубедливо. Во првото полувреме, Џовани Ло Селсо ја погоди пречката со удар од работ на шеснаесетникот, додека во продолжението обидот на Томас Аранда беше добро одбранет од хондурасскиот голман. СП 2026 Автор/Извор А.С. Прикажи во метро On