Telegrafi

Qytetari ngre shqetësime për markerin zgjedhor, pretendon se ngjyra largohet lehtësisht nga gishti

Kosova po zhvillon procesin e votimit për Zgjedhjet e Jashtëzakonshme Parlamentare, ndërsa deri më tani nuk është raportuar për incidente që do të cenonin mbarëvajtjen e procesit zgjedhor. Qendrat e votimit janë hapur në orën 07:00 dhe qytetarët po ushtrojnë të drejtën e tyre të votës në të gjithë vendin. Megjithatë, në redaksinë e Telegrafit ka mbërritur një video në të cilën një qytetar shpreh shqetësime lidhur me markerin që përdoret për shënjimin e votuesve para votimit. Sipas pretendimit të tij, ngjyra e markerit po largohet lehtësisht nga gishti, ndryshe nga zgjedhjet e kaluara kur shenja mbetej e dukshme për disa ditë. Në pamjet e dërguara, shihet se ngjyra e vendosur në gisht mund të hiqet me një pecetë, gjë që ka ngritur shqetësime për efektivitetin e këtij mekanizmi identifikues. Megjithatë, nuk dihet nëse rasti i paraqitur në video është i izoluar apo nëse bëhet fjalë për një problem më të gjerë me markerët e përdorur në këto zgjedhje. Institucionet përgjegjëse nuk kanë dalë ende me ndonjë sqarim lidhur me këtë pretendim. Kujtojmë se markerët përdoren si një nga masat për të parandaluar votimin e shumëfishtë dhe për të garantuar integritetin e procesit zgjedhor. / Telegrafi /