Kurir
Сценаријата за спортските филмови често изгледаат нереално. Момче кое расте во институција, игра фудбал на улица, а потоа за неколку месеци го привлекува вниманието на професионалниот фудбал. Од анонимност до светска слава. Од уличните терени до канцеларијата на најголемиот тренер на својата генерација. Но токму таква е животната приказна на Тијаго Мануел Диаш Кореја, познат како Бебе. Роден од родители имигранти од Зеленортските Острови, детството го поминал под грижа на својата баба. Таа го однела во Домот за деца без родителска грижа „Санто Антао до Тожал“ во Лореш, надевајќи се дека таму ќе добие подобра иднина. Во 2009 година Бебе блеснал на Светското првенство во уличен фудбал. Настапувајќи за португалска селекција составена од млади луѓе поддржани од организацијата CAIS, постигнал неверојатни 40 голови на шест натпревари во Босна и Херцеговина. Токму тој турнир му ја отворил вратата кон професионалниот фудбал и трансфер во Естрела да Амадора. Сезоната 2009/10 ја поминал во клуб кој се борел со сериозни финансиски проблеми, но неговата сила, брзина и моќен удар биле доволни за да го привлечат вниманието на Виторија Гимараеш. Тоа требало да биде неговиот голем чекор кон елитниот португалски фудбал. Но летото 2010 година донело нешто што никој не можел да го предвиди. На подготовките во Гимараеш се појавил фудбалер каков што португалскиот фудбал ретко видел – суров, неоформен талент со спринтерска брзина и инстинкти од уличниот фудбал. Наместо да се бори за место во тимот, за само неколку недели добил понуда од Манчестер Јунајтед. Сер Алекс Фергусон го ангажирал за околу девет милиони евра, иако подоцна призна дека никогаш претходно не го гледал во живо. Кога Бебе пристигнал во Манчестер, легендарниот шкотски тренер веднаш му предложил промена на имиџот. Истото попладне ги отсекол своите препознатливи расти. Промената била драматична и финансиски. Во Естрела заработувал околу 1.100 евра месечно, а во Манчестер Јунајтед платата му скокнала на околу 97.000 евра месечно. Кога ја добил првата исплата, мислел дека станува збор за плата за пет месеци, а не за еден. Сепак, скокот бил преголем. Подоцна самиот призна дека било речиси невозможно играч кој доаѓа од третата лига веднаш да се наметне меѓу најдобрите фудбалери во светот. За Манчестер Јунајтед одиграл само седум натпревари и постигнал два гола. Многумина го нарекоа едно од најголемите промашувања во ерата на Фергусон. Но за момчето од Домот за деца без родителска грижа тоа сепак значеше остварување на сон што дотогаш изгледал невозможен. Следуваа настапи за Пакош де Фереира, Бенфика, Кордоба, Рајо Ваљекано, Еибар, Сарагоса и Расинг Ферол. Во Бенфика тренерот Жорже Жесус одбивал да го нарекува Бебе. „Бебе? Тој е Тијаго. Не можам да викам Бебе на човек висок 190 сантиметри“, знаел да каже португалскиот стратег. Во меѓувреме Бебе стана и репрезентативец на Зеленортските Острови. За националниот тим одигра 27 натпревари и постигна шест голови, помагајќи му на својот тим да стигне до четвртфиналето на Африканскиот куп на нации во 2023 година. Најголемиот дел од кариерата го помина во Шпанија, каде одигра 247 натпревари во првата и втората лига. И денес, кога веќе е во доцните фудбалски години, одвреме-навреме знае да потсети на момчето од улиците на Лореш. Понекогаш ќе упати шут од 30 или 35 метри, див, инстинктивен и непредвидлив, како да игра на бетонско игралиште, а не на професионален стадион. Повеќето од тие удари завршуваат далеку од голот. Но некои завршуваат во мрежата и изгледаат како кандидати за наградата „Пушкаш“. Тогаш сите повторно се потсетуваат на талентот што еднаш го однесе од улица директно на „Олд Трафорд“.
Go to News Site
Press24 
Вечер 
ZHURNAL 
