Kurir
Постоеше време кога името на Кристијано Роналдо не ечеше низ стадионот на Ал Наср. Време кога богатството на клубот не се мереше со милијарди од државни фондови и нафтени деривати, туку со чиста, фудбалска страст. Во таа ера, Ријад имаше само еден крал – Маџед Абдула. За разлика од модерните ѕвезди кои брзо ги менуваат клубовите, Абдула му ја посвети целата своја кариера на Ал Наср, играјќи од 1977 до 1998 година. Кристијано Роналдо обожава да урива рекорди, но ќе треба добро да се испоти и да скине уште многу дресови за да го стигне човекот кој со децении го носеше прекарот „Пустинскиот Пеле“. Во својата дведецениска верност кон жолтиот дрес, Абдула постигна неверојатни 259 официјални голови (дури 320 ако се бројат и пријателските натпревари). Тој и денес е најдобриот стрелец во историјата на националниот тим на Саудиска Арабија, со 72 погодоци во 117 натпревари, и се смета за темел на тамошниот фудбал. Беше предводник во историските моменти: првиот пласман на Саудијците на еден Мундијал во 1994 година, двете последователни титули во Азискиот куп (1984 и 1988) и единствениот гол за својата земја на Олимписките игри во Лос Анџелес во 1984 година. Капетан Маџед – инспирација за култниот цртан филм Приказната на Абдула започнува во Џеда, каде што е роден пред 67 години, но неговото семејство набрзо се преселило во Ријад бидејќи неговиот татко почнал да работи како фудбалски тренер. Интересно е што Маџед својата кариера ја започнал како голман. Сепак, брзо станало јасно дека неговата судбина со мрежите не е да ги брани, туку жестоко да ги тресе. На 16-годишна возраст го потпишал првиот договор за Ал Наср, а само пет години подоцна бил клучен за освојувањето на првата историска шампионска титула на клубот. Иако на теренот беше незапирлив стрелец со сурова техника и нестварен дриблинг, Абдула приватно беше тивок и повлечен човек, со речиси митска аура. Легендата вели дека при арапската адаптација на култната јапонска анимирана серија „Капетан Цубаса“, главниот лик го добил името Капетан Маџед токму во чест на овој славен напаѓач. Како Западот го откри „Пустинскиот Пеле“ Во ера кога фудбалот сè уште не беше глобално поврзан како денес, западниот свет за првпат вистински го запозна Абдула дури на крајот од неговата кариера. Кога Саудиска Арабија се појави на Светското првенство во САД во 1994 година, странските медиуми беа фасцинирани од неговата природна лидерска моќ, леснотијата со која ги наоѓаше патиштата до голот и елегантниот дриблинг. Тогаш го доби прекарот „Пустинскиот Пеле“, иако самиот скромно изјавуваше дека не е достоен за таква споредба. Токму на тој Мундијал, на мечот од групната фаза против Белгија, Абдула го одигра својот последен натпревар за репрезентацијата. По пензионирањето, тој остана тивок, но неговиот збор и денес има најголема тежина во саудискиот фудбал. За неговиот живот дури беше снимена и биографска театарска претстава наречена „Огнената стрела“, која ја раскажува неговата нераскинлива врска со народот. Експлозијата и доаѓањето на Кристијано Роналдо во неговиот Ал Наср не предизвикаа љубомора кај старата легенда, туку само зборови на почит. Кога Португалецот го собори рекордот за најмногу голови во една сезона во саудиската лига, Абдула прв му честиташе: „Кристијано е пример што треба да се следи. Годините играат секундарна улога во перформансите на еден играч кога страста е сè уште присутна“, изјави Абдула. Тоа го вели човек кој најдобро знае како е да се владее со Ријад со децении – само со помош на чиста фудбалска страст.
Go to News Site
Вечер 
Press24 
