Grænland enn á dagskrá vestra

Grænland er í ferli, þannig hefur ástandinu verið lýst í kjölfar uppnámsins sem varð eftir yfirlýsingar Donalds Trumps um að Bandaríkin þyrftu yfirráð á Grænlandi til að treysta eigin varnir. Talað var um fundi embættismanna og leiðir til að finna niðurstöðu sem allir gætu sætt sig við. Og svo færðist athyglin annað. En miðað við orð Gregorys Guillot, yfirmanns Norðurherstjórnar Bandaríkjanna, í síðustu viku er Grænland enn á dagskrá vestra. Á fundi varnarmálanefndar Öldungadeildarinnar sagði Guillot að þörf væri á að minnsta kosti þremur landsvæðum á Grænlandi fyrir starfsemi Bandaríkjahers, meðal annars fyrir flugvélar, sérsveitir og sjóher. Guillot sagði núverandi aðstöðu á Grænlandi, þar á meðal herstöðina í Pituffik, gegna lykilhlutverki en ekki duga til ein og sér fyrir þá uppbyggingu sem stefnt væri að. Hann greindi líka frá því að Grænland hefði verið fært inn í ábyrgðarsvæði Norðurherstjórnarinnar. Með því eru varnir á eyjunni orðnar hluti af vörnum meginlands Norður-Ameríku. Joseph Humire, sem fer með málefni heimalandsvarna og öryggis á vesturhveli í bandaríska varnarmálaráðuneytinu, sagði að ráðuneytið væri að tryggja „lykilsvæði“ frá Alaska og Grænlandi að Panamaskurði. Grænland skipti sköpum fyrir loftvarnir, eftirlit, siglingaleiðir og eldflaugavarnir Bandaríkjanna. Hann lýsti norðurslóðum sem kjarnasvæði í vörnum en ekki jaðarsvæði, eins og lengst var.

Go to News Site