Vill íslenskt mállíkan svo viðkvæmar upplýsingar verði ekki söluvara

„Það verður að búa svo um hnútana að viðkvæm gögn og mikilvægar upplýsingar rati ekki inn í gagnagrunna erlendra stórfyrirtækja í meira mæli en orðið er,“ segir Logi Einarsson, menningar-, nýsköpunar- og háskólaráðherra, í grein á Vísi þar sem hann fjallar um það sem hann kallar gervigreindarfullveldi þjóðarinnar. Logi segir að Ísland sé langt komið í samanburði við mörg önnur lönd þegar kemur að gervigreind; unnið sé að aðgerðaáætlun og unnið að því að treysta stoðir gervigreindarfullveldis. Hann segir að í slíku fullveldi felist geta þjóðar til að þróa, hýsa og hafa áhrif á gervigreindartækni. „Í dag mætti segja að Ísland skorti enn marga af þessum þáttum enda treystum við nær alfarið á tækni sem er hýst erlendis – staðreynd sem vekur meðal annars upp spurningar um persónuvernd, gagnaöryggi og getu okkar til þess að verjast utanaðkomandi áhrifum á lýðræðislega umræðu. Því vinnum við nú markvisst að því að koma upp þekkingu og getu á þessu sviði og þannig auka viðnámsþrótt og þjóðaröryggi.“ Logi segir að tryggja verði og verja hér á landi viðkvæm gögn og mikilvægar upplýsingar á borð við heilsufars- og fjárhagsupplýsingar og það sem varði öryggi borgara og samfélags, það eigi ekki að fara í meira mæli inn í gagnagrunna erlendra stórfyrirtækja. Þess vegna höfum við hug á að koma á fót íslensku mállíkani þar sem unnið verður með gögn sem ekki mega verða söluvara á markaði. Markviss undirbúningur að gerð mállíkansins er hafinn og við erum í samtölum við leiðandi alþjóðlegt fyrirtæki um þróun þess, sem verður kynnt betur í náinni framtíð.“ Logi segir að þrennt þurfi að tryggja: tæknilega innviði til að þróa og hýsa gervigreindarlíkön á Íslandi, sérhæft starfsfólk sem geti haldið tækninni við og þróað nýjar lausnir og aðgang að stóru mállíkani sem veiti íslenskri tungu fyrsta flokks stuðning um leið og það virði gildi, lög og menningu Íslendinga.

Go to News Site