Kosova në Bratislavë - rruga drejt historisë

Në orët e mbrëmjes të së martës, ekipi i Telegrafit mori rrugën drejt Bratislava , aty ku në mëngjesin pasues ndjehej se diçka e madhe po afrohej. Ishte qyteti ku Kombëtarja e Kosovës kërkon historinë. Për herë të parë, “Dardanët” janë pjesë e një “play-off”-i për Kupën e Botës – një mundësi e artë, e fituar me meritë pas një kampanje të jashtëzakonshme, duke lënë pas emra të mëdhenj si Suedia dhe Sllovenia. Shorti i vuri përballë Sllovakinë, një kundërshtar i fortë, por edhe një përballje me peshë përtej fushës. Takimi me historinë është caktuar të enjten, në ora 20:45. Gazetarët e Telegrafit Romak Zeqiri dhe Lavdim Pireva Foto: Brahim Nura Bratislava – sheshet që u “pushtuan” nga Dardanët Bratislava është kryeqyteti sllovak, është një rrëfim i qetë që shtrihet përgjatë lumit Danub. Në zemër të saj rreh qyteti i vjetër, një labirint rrugicash të ngushta ku koha duket sikur ka ndalur, por që njëkohësisht të mbush me emocion. Ndërtesat e vjetra, kafenetë e bukura, monumentet fetare dhe artistike krijojnë një tablo që merr frymë lirshëm mes pemëve dhe dritave të mbrëmjes. Qendra e Bratisllavës Foto/ Korab Basha Lart mbi qytet qëndron kështjlla e Bratisllavës, prej nga hapet një pamje mahnitëse e Danubit dhe qytetit. Por këtë herë, diçka ishte ndryshe. Në mbrëmje, kafenetë e qendrës së vjetër nisën të mbusheshin me shqiptarë. Dardanët vinin grupe-grupe, të bindur në fitore. Qendra e Bratisllavës Foto/ Korab Basha Këngët nuk pushuan deri në orët e vona, atmosfera ishte elektrizuese. Qyteti i vjetër dukej më i gjallë se kurrë – sikur vetë Bratislava të ishte zgjuar për këtë moment, në pritje të së enjtes. View this post on Instagram A post shared by Telegrafi Sport (@telegrafisport) Stadiumi – foleja moderne dhe pushtimi dardan Në kontrast me qetësinë historike, Tehelné pole Stadium përfaqëson ritmin modern të qytetit. Një arenë që ka parë dekada histori – e ndërtuar fillimisht në vitin 1940, e rrënuar në vitin 2013 dhe e rilindur në vitin 2019 si një stadium modern. Sot, me mbi 22 mijë ulëse, është shtëpia e klubit më të madh sllovak, Slovan Bratislava. Por për një natë, do të jetë diçka më shumë se kaq. View this post on Instagram A post shared by Telegrafi Sport (@telegrafisport) Mbi 7 mijë tifozë shqiptarë pritet të jenë në shkallët e stadiumit. Një “pushtim” i vërtetë dardan, ku ngjyrat kuqezi dhe thirrjet për Kosovën do ta mbulojnë çdo cep të arenës. Ka vetëm një qëllim: fitorja. Një hap drejt finales së “play-off”-it dhe më pas drejt një ëndrre edhe më të madhe – Kampionatit Botëror. View this post on Instagram A post shared by Telegrafi Sport (@telegrafisport) Foda dhe Muriqi, me besim drejt fitores Në konferencën për shtyp, përzgjedhësi Franco Foda foli me qetësi, por me vendosmëri. Ai theksoi përgatitjen e mirë të skuadrës dhe fokusin në aspektin taktik, duke kujtuar fitoret e mëdha si mysafir ndaj Islandës, Suedisë dhe Sllovenisë. “Synojmë fitoren”, ishte mesazhi i tij i qartë. Nga ana tjetër, sulmuesi Vedat Muriqi u shfaq i sigurt dhe plot vetëbesim. Ai nuk hezitoi të marrë përgjegjësinë për një penallti të mundshme, duke treguar mentalitetin e një lideri në fushë. Madje, me humor foli edhe për përballjen me bashkëlojtarin e tij te Mallorca, Martin Valjent, këtë herë si kundërshtar. Franco Foda dhe Vedat Muriqi Foto: Brahim Nura Nesër – përballja me historinë Gjithçka është gati. Qyteti pret. Stadiumi pret. Tifozët janë gati. Dhe Kosova është vetëm një ndeshje larg historisë. Të enjten, në ora 20:45, nuk është thjesht një ndeshje futbolli. Është një moment që mund të ndryshojë gjithçka. Një natë ku ëndrra takohet me realitetin. Ekipi i Telegrafit ndodhet në Bratislavë, me gazetarët Lavdim Pireva dhe Romak Zeqiri, si dhe kameramanin Korab Basha. Udhëtimi i ekipit është mundësuar nga 99esim , Globi M.I , DFK Group dhe Lasko ./Telegrafi/

Go to News Site