Sennilegt að stýrivextir hækki frekar

Unu Jónsdóttur, forstöðumanni hagfræðideildar Landsbankans, þykir frekari stýrivaxtahækkanir nokkuð líklegar í ljósi nýjustu verðbólgutalna. „Þetta eru slæm tíðindi. Við höfum ekki séð svona mikla verðbólgu síðan í september 2024,“ segir hún. Hærra olíuverð Verðbólga var 5,4% í mars og hefur aukist um 0,2 prósentustig frá því í febrúar. Una segir segir að það megi að miklu leyti rekja til hærra olíuverðs vegna stríðsátaka í heiminum. Hækkun á olíuverði getur smitað út frá sér og valdið almennum verðhækkunum. Verð á mat og drykkjarvöru hafi til dæmis hækkað meira en gert var ráð fyrir. „Það er alls ekki eitthvað sem við viljum sjá.“ Minni hækkanir á húsnæðisverði valda því að húsnæði ýtir ekki undir verðbólguna. „Húsnæði hefur oft verið sökudólgurinn að aukinni verðbólgu. Það er ánægjulegt að sjá að húsnæðisliðurinn hefur róast.“ Seðlabankinn hækkaði stýrivexti um 0,25 prósentustig í síðustu viku. Þeir eru nú 7,5%. Unu þykir nokkuð líklegt að stýrivextir hækki frekar. Þeir séu helsta tólið til að bregðast við verðbólgu. „Þessi mæling ýtir undir þá þróun að þeir þurfi að hækka vexti aftur.“ Allir verða að taka höndum saman Unu finnst erfitt að segja til um hvort verðbólga aukist á næstu mánuðum. „Við vonumst til þess að þetta sé hápunkturinn og við sjáum hana mjakast niður í rétta átt. Það er háð þeirri forsendu að það verði gripið inn í, Seðlabankinn haldi áfram að hækka vexti og fleiri aðilar taki sig saman um að vinna bug á þessari þróun.“ Í því samhengi nefnir hún vinnumarkaðinn og ríkisvaldið. „Það þurfa í raun allir að taka höndum saman.“

Go to News Site