Inga vill lengri skóladaga og lengra skólaár íslenskra nemenda

Útgjöld á hvern nemanda í grunn- og framhaldsskóla hér á landi eru þau hæstu innan OECD-landanna. Námsárangurinn er á sama tíma undir meðaltali og kennsluskylda kennara lítil, samkvæmt minnisblaði sem Inga Sæland, mennta- og barnamálaráðherra, lagði fyrir ríkisstjórnina í vikunni. Í minnisblaðinu segir að nauðsynlegt sé að taka umræðuna upp í kjarasamningsviðræðum kennara og gera starfsaðstæður þeirra sambærilegri við aðra opinbera starfsmenn. Ísland undir meðaltali í samanburði við önnur lönd Inga segir nauðsynlegt að gera breytingar á íslensku skólakerfi. „Ég hef nú ítrekað talað um það og fordæmt í rauninni það að hér skuli nánast helmingur barnanna okkar útskrifast eftir 10 ára grunnskólagöngu með mjög svo ónægan lesskilning og nánast ólæs í einhverjum tilvikum. Og já, við þurfum að bregðast við.“ Í minnisblaðinu kemur fram að íslenskir nemendur njóti færri virkra kennslustunda og færri kennsludaga en jafnaldrar þeirra í mörgum öðrum evrópskum ríkjum. Samkvæmt minnisblaðinu getur munurinn milli íslenskra og danskra nemenda numið allt að fjórum kennsluárum yfir alla grunnskólagönguna. Samningsbundin kennsluskylda kennara er minni en á öðrum Norðurlöndum og undir meðaltali OECD-ríkjanna. Auka þarf kennslu um fjórðung til að ná meðaltali OECD-ríkja á yngsta stigi grunnskóla. Í minnisblaðinu segir að bæta megi námsárangur íslenskra nemenda og gæði skólastarfs með því að lengja skólaárið og fjölga kennslustundum. Kennarar hafa kvartað undan álagi Í viðhorfskönnun Kennarasambands Íslands, sem framkvæmd var 2024, kom fram að rúmur fjórðungur leik- og grunnskólakennara sá ekki fyrir sér að vera í sama starfi eftir fimm ár. Flóknir nemendahópar og börn sem ekki hafa íslensku að móðurmáli auka álagið á kennara. Eins telja einhverjir kennarar bekkjarhópa of fjölmenna og að fækka þurfi nemendum á hvern kennara til að draga úr álagi. Næsta skref að tala við sveitarfélögin um breytingarnar Inga segir minnisblaðið gert til þess að draga fram sannleikann um stöðuna í íslensku skólakerfi, eins og hún er. Í niðurstöðum minnisblaðsins segir að tækifæri séu til að bæta námsárangur íslenskra barna og gæði skólastarfs með því að lengja skólaárið og fjölga kennslustundum. Inga segir næstu skref að tala við sveitarfélög og alla hagaðila og finna sameiginlega lausn, með hagsmuni barna í huga. Hvaða lausn ertu þá að tala um? „Nei ég er að segja það. Þá þyrfti ég varla samráð ef ég væri með lausnina í fanginu hér og nú. Þá gæti ég sennilega bara sveiflað töfrasprotanum en það er ekki í boði. Við þurfum að tala saman, kennarar, sveitarfélög og allir,“ segir Inga. Í niðurstöðum minnisblaðsins segir einnig að umræðuna þurfi að taka upp í kjarasamningsviðræðum kennara. Starfsaðstæður kennara þurfi að vera sambærilegri við aðra opinbera starfsmenn sem vinna jafnara yfir árið. Næstu skref séu jafnframt að hefja samtal við sveitarfélög um að fjölga kennsludögum og kennslutímum. Finnst þér raunhæft að auka álag bæði á kennara og nemendur, miðað við ástandið innan skólakerfisins og álagið núna? „ Þetta er bara einn liður í þeim breytingum sem verður ráðist í,“ segir Inga.

Go to News Site