Fréttastofa RÚV

Formaður Landverndar segir hægt að friða kóralrif og fjallagarða neðansjávar strax

Alþjóðleg markmið gera ráð fyrir verndun 30% land- og hafsvæða fyrir 2030. Ísland er vel á veg komið með að ná því markmiði á landi en aðeins 2% hafsvæða falla undir þessa skilgreiningu. Stærstu náttúruverndarsamtök Norðurlandanna héldu árlegan fund sinn á Íslandi í maí. Þema fundarins var verndarsvæði í hafi. Samtökin eru samhljóma um að mikil tækifæri liggi í samstarfi milli landa til þess að koma á fót hafverndarsvæðum þvert yfir landamæri. Þorgerður María Þorbjarnardóttir, formaður Landverndar, segir einkum tvö ráðuneyti koma að málaflokknum, annars vegar umhverfis-, orku-, og loftslagsráðuneytið og hins vegar atvinnuvegaráðuneytið. Í nýrri aðgerðaáætlun um vernd líffræðilegrar fjölbreytni sé ekki sérstaklega fjallað um vernd hafsvæða. Íslensk stjórnvöld þurfa að taka ákvörðun um að vernda mikilvæg hafsvæði. Við vitum alveg helling um hafið þó að alltaf megi rannsaka betur. Við vitum að það er fullt af kóröllum í kringum Ísland, við vitum að það eru neðansjávar fjallagarðar. Þannig að það eru alveg til svæði sem við getum strax ákveðið að friða. Hún segir það gjarnan gleymast að á hafsbotni séu alls konar vistkerfi sem Ísland hafi beina hagsmuni af því að vernda. Hafið býr til svo mikið af súrefninu sem við notum. Við náttúrulega erum fiskveiðiþjóð þannig að við höfum mjög mikla hagsmuni af því að hafið okkar sé heilbrigt. En auðvitað hefur þetta kannski verið pínulítið útundan af því að þetta er ekki aðgengilegt. Við eigum fæst færi á því að komast niður að hafsbotni þannig að þetta er svolítið hulinn heimur. Þannig ég held að það hafi verið aðalástæðan fyrir því að þetta hefur mætt afgangi.