Independent Urdu

WhatsApp X (Twitter) Facebook Telegram Link

تھرپارکر: اونٹنی کی ’آنکھیں نکالنے‘ کے واقعے پر وزیر اعلیٰ کا نوٹس

تھرپارکر میں پولیس کا کہنا ہے کہ مبینہ طور پر اونٹنی کی آنکھیں نکالنے والے دو ملزمان کو حراست میں لے لیا گیا ہے۔ یہ واقعہ سندھ کے ضلع تھرپارکر کی تحصیل ڈاہلی کے گاؤں بنگل رند میں پیر کو پیش آیا۔ تاہم تاحال اس واقعے کی وجہ سامنے نہیں آ سکی ہے۔ وزیر اعلیٰ سندھ نے اونٹنی کی مبینہ طور پر دونوں آنکھیں نکالنے کے واقعے کا نوٹس لیتے ہوئے ڈی آئی جی میرپور خاص سے فوری رپورٹ طلب کر لی ہے۔ اس کے علاوہ وزیر اعلیٰ سندھ کی جانب سے جاری بیان میں پولیس کو واقعے میں ملوث افراد کے خلاف سخت قانونی کارروائی کی ہدایت کی گئی ہے۔ بیان میں وزیر اعلیٰ سندھ نے کہا کہ ’بے زبان جانوروں پر ظلم و تشدد کسی صورت برداشت نہیں کیا جا سکتا اور ذمہ داروں کو قانون کے مطابق سزا دی جائے گی۔‘ وزیراعلیٰ کے نوٹس کے بعد لائیو سٹاک محکمہ بھی متحرک ہو گیا ہے۔ لائیو سٹاک تھرپارکر کی ڈاکٹرز ٹیموں نے متاثرہ اونٹنی کا طبی معائنہ مکمل کر کے علاج شروع کر دیا ہے۔ ایس ایچ او کھینسر غلام مجتبیٰ بھٹو کے مطابق اب تک دو ملزمان کو حراست میں لیا گیا ہے۔ مزید پڑھ اس سیکشن میں متعلقہ حوالہ پوائنٹس شامل ہیں (Related Nodes field) غلام مجتبیٰ نے انڈپینڈنٹ اردو سے بات کرتے ہوئے کہا کہ ’ملزم محمد حنیف اور روشن علی کو حراست میں لیا گیا ہے، مدعی کے بیان لے کر مقدمہ درج کیا جائے گا۔‘ دوسری جانب متاثرہ خاندان اور مقامی افراد نے خواتین اور بچوں سمیت احتجاج کیا اور الزام عائد کیا کہ پڑوسی گاؤں کے بعض افراد اس واقعے میں ملوث ہیں۔ مظاہرین نے واقعے کی شفاف تحقیقات اور ذمہ داروں کے خلاف قانونی کارروائی کا مطالبہ کیا ہے۔ سندھ میں پیش آنے والا یہ پہلا واقعہ نہیں ہے بلکہ جون 2024 میں بھی سانگھڑ کے علاقے منڈ جمڑاؤ میں ایک شخص کے پالتو اونٹ کی ٹانگ کاٹنے کا واقعہ پیش آیا تھا۔ سومر بین نامی شخص کی اونٹنی نے 13 جون کو ضلع سانگھڑ کے علاقہ منگلی میں ایک کھڑی فصل کو نقصان پہنچایا جس پر وہاں موجود ملزمان نے اس کی ٹانگ کاٹ دی تھی۔ میڈیا پر واقعے کی کوریج کے بعد زخمی اونٹنی کو سانگھڑ سے کراچی میں جانوروں کے حقوق کی تنظیم سی ڈی آر ایس بینجی پراجیکٹ فار اینیمل ویلفیئر کے شیلٹر ہوم منتقل کر دیا گیا تھا۔ پاکستان سندھ اونٹ تھرپارکر وزیر اعلیٰ سندھ نے اونٹنی کی مبینہ طور پر دونوں آنکھیں نکالنے کے واقعے کا نوٹس لیتے ہوئے ڈی آئی جی میرپور خاص سے فوری رپورٹ طلب کر لی ہے۔ ممتاز جمالی بدھ, جون 10, 2026 - 07:30 Main image: اونٹنی کی مبینہ طور پر آنکھیں نکالنے کا واقعہ 8 جون 2026 کو ضلع تھرپارکر کی تحصیل ڈاہلی کے گاؤں بنگل رند میں پیش آیا (فوٹو: برکت باجیر) پاکستان type: news related nodes: کھیت میں گھسنے والی اونٹنی پر تشدد کا مقدمہ درج، ایک ملزم گرفتار: سکھر پولیس اونٹنی کی ٹانگ کاٹنے کا معاملہ سیاست کی نذر ہو سکتا ہے: پولیس زخمی اونٹنی کو مصنوعی ٹانگ لگنے تک عارضی سہارا بنا کر دیا جائے گا سانگھڑ: ’فصل کھانے پر‘ اونٹ کی ٹانگ کاٹنے کا مقدمہ درج SEO Title: تھرپارکر: اونٹنی کی ’آنکھیں نکالنے‘ کے واقعے پر وزیر اعلیٰ کا نوٹس copyright: show related homepage: Hide from Homepage

Google Play App Store