Fréttastofa RÚV

Velja kjósendur að styrkja tengsl við Evrópu eða Rússa?

Kosið er til þings í Armeníu í dag. Nýjustu kannanir sýna að flokkur forsætisráðherrans sé með mest fylgi en niðurstöður kosninganna ráða því hvort Armenar halli sér meira að Evrópu og fjarlægist hefðbundna bandamenn, eins og Rússa. Fyrstu kosningarnar eftir yfirtöku Asera á Nagorno-Karabakh Þetta eru fyrstu kosningarnar í landinu síðan það missti yfirráð yfir héraðinu Nagorno-Karabakh 2023. Nikol Pashinyan, forsætisráðherra landsins, sækist eftir endurkjöri. Nýjustu kannanir sýna að flokkur hans sé með mest fylgi, 32 prósent, en um 40 prósent kjósenda segjast ekki treysta neinum stjórnmálamanni. Síðan Pashinyan náði kjöri 2018 hefur hann stýrt landinu frá Rússlandi og reynt að styrkja tengsl við Vesturlönd. Fái hann og flokkur hans sterkt umboð eftir kosningar getur hann fylgt eftir aðalmarkmiði sínu, að ná friðarsamningi við Aserbaísjan. Þjóðirnar hafa lengi eldað grátt silfur saman og 2023 náðu Aserar héraðinu Nagorno-Karabakh á sitt vald. Það varð til þess að um hundrað þúsund Armenar þurftu að flýja heimili sín í héraðinu. Helsti keppinautur Pashinyan er Samvel Karapetyan, rússnesk-armenskur milljarðamæringur sem er í stofufangelsi fyrir tilraun til valdaráns. Hann talar fyrir nánari tengslum við Rússland og sigri flokkur hans gæti Armenía farið inn á sömu braut og Georgía . Undanfarin ár hafa stjórnvöld þar fjarlægst tengsl við Evrópu og styrkt tengsl við Rússa. Kosningarnar hafa vakið athygli á alþjóðavísu, þrátt fyrir að Armenar séu aðeins um þrjár milljónir. Stjórnvöld í Evrópu, Bandaríkjunum og Rússlandi fylgjast vel með úrslitum þeirra. Kjörstöðum verður lokað klukkan fjögur síðdegis að íslenskum tíma og búast má við útgönguspám fljótlega eftir það. „Aðrir valkostir eru miklu verri“ Margir kjósendur eru vonsviknir með Rússa eftir að þeir komu Armenum ekki til hjálpar þegar Aserbaísjan tók yfir Nagorno-Karabakh, þrátt fyrir að rússneskir friðargæsluliðar hafi verið til staðar í héraðinu. Pashinyan dró Armeníu út úr öryggisbandalagi með Rússlandi og sex öðrum fyrrum Sovétríkjum í kjölfarið og hefur meðal annars samþykkt lög sem gera þjóðinni kleift að sækja um aðild að Evrópusambandinu. Armenskir embættismenn og greinendur segja Rússa hafa reynt að hafa áhrif á kosningarnar með falsfréttaherferðum og upplýsingaóreiðu. Tilgangurinn hafi verið að reyna að láta frambjóðendurna sem eru hliðhollir Rússum, eins og Karapetyan, koma betur út. Þeir saka Rússa einnig um að hafa flogið Armenum sem búa í Rússlandi til heimalandsins til að kjósa gegn Pashinyan. Rússnesk stjórnvöld hafa einnig undanfarna mánuði takmarkað innflutning á ýmsum armenskum vörum til Rússlands, meðal annars áfengi, fiski og ávöxtum. Rússar eru helsta viðskiptaþjóð Armena. Breski fjölmiðillinn The Guardian ræddi við nokkra kjósendur í dag. Karen Grigoryan er læknir sem kaus Karapetyan. Hann sagði Pashinyan hafa breyst. „Pashinyan er ekki maðurinn sem hann var þegar hann var fyrst kjörinn.“ Greinendur hafa sagt marga kjósendur styðja Pashinyan að stórum hluta því andstæðan við Rússland sé svo mikil. Tatul Hakobyan er armenskur fréttaskýrandi. Hann sagði að af tvennu illu velji fólk frekar Pashinyan. „Fólk er að velja það sem er skárra af tveimur slæmum kostum. Aðrir valkostir eru miklu verri.“