Mediamax

Բանակցող եւ առաջամարտիկ. Հայաստանում ԵՄ նոր առաքելության ղեկավարը

ԵՄ Խորհուրդը ռումինացի դիվանագետ Կոսմին Ջորջ Դինեսկուին նշանակել է Հայաստանում ԵՄ գործընկերության առաքելության (EUPM Armenia) ղեկավար։ Ներկայացնում ենք մի քանի փաստ նրա մասին։ 25-ամյա փորձ Դինեսկուն դեսպանի աստիճանով կարիերային դիվանագետ է՝ միջազգային հարաբերությունների ոլորտում 25-ամյա փորձով։ Նա ունի տնտեսագիտության եւ իրավագիտության բակալավրի կոչում, սոցիալական մարդաբանության ու հասարակական զարգացման մագիստրոսի աստիճան, ինչպես նաեւ իրավաբանական գիտությունների դոկտորի կոչում։ Ազատ տիրապետում է ռումիներեն, անգլերեն, ֆրանսերեն, իսպաներեն եւ խորվաթերեն լեզուներին։ Աշխատանք ՄԱԿ-ի Միջազգային դատարանում Կարիերայի ընթացքում Դինեսկուն մասնակցել է երկկողմ եւ բազմակողմ բանակցությունների, այդ թվում՝ ՄԱԿ-ի Միջազգային դատարանում։ 2008 թվականի սեպտեմբերին նա որպես Ռումինիայի ԱԳՆ իրավական հարցերի գլխավոր տնօրեն ելույթ ունեցավ դատարանում Սեւ ծովում ծովային սահմանազատման մասին աղմկոտ գործով (Ռումինիա ընդդեմ Ուկրաինայի) ։ ՄԱԿ-ի հանձնաժողով 2009 թվականին Դինեսկուն ղեկավարել է ՄԱԿ-ի հանցագործությունների կանխարգելման եւ քրեական արդարադատության հանձնաժողովի (CCPCJ) 18-րդ նստաշրջանը։ Հանձնաժողովը, որի կենտրոնակայանը Վիեննայում է, քրեական արդարադատության ոլորտում ՄԱԿ-ի քաղաքականություն մշակող մարմինն է։ Կարիերայի փուլերը 1999 թվականի հունվարին Կոսմին Ջորջ Դինեսկուն աշխատանքի անցավ Ռումինիայի ԱԳՆ-ում՝ որպես Միջազգային իրավունքի եւ պայմանագրերի տնօրինության ատաշե։ 2004-2010 թթ. ղեկավարել է Ռումինիայի ԱԳՆ իրավական հարցերի գլխավոր տնօրինությունը։ 2010-2016 թթ.՝ Ռումինիայի դեսպանն էր Խորվաթիայում։ 2016-2019 թթ.՝ Ռումինիայի ԱԳՆ գլխավոր քարտուղար։ Այս պաշտոնում 2018 թվականի սկզբին խորհրդակցություններ վարեց Վիլնյուսում եւ Ռիգայում՝ Ռումինիան նախապատրաստելով ԵՄ Խորհրդի նախագահությանը։ 2019 թ.՝ Ռումինիայի ԵՄ Խորհրդում նախագահության ընթացքում հանդես է եկել որպես Խորհրդի գլխավոր բանակցող Եվրոպական խորհրդարանի ու Եվրոպական հանձնաժողովի հետ հյուպատոսական հարցերով բանակցություններում։ 2019-2023 թթ.՝ Ռումինիայի դեսպանն էր Լիտվայում եւ Լատվիայում։ «Առաջամարտիկ» Դինեսկուն ղեկավարել է Մոլդովայում ԵՄ գործընկերության առաքելությունը (EUPM Moldova) դրա հիմնադրման պահից՝ 2023 թվականի ապրիլից, մինչեւ 2026 թվականի ապրիլի 24-ը։ Նա դրել է ԵՄ-ի առաջին քաղաքացիական առաքելության հիմքերը, որի նպատակը հիբրիդային սպառնալիքներին հակազդելն էր։ «Մոլդովայի Հանրապետությունը ցուցաբերեց կայունության եւ զարգացման արտակարգ ունակություն՝ ծանրագույն մարտահրավերների առջեւ, եւ դարձավ՝ այդ թվում մեր աջակցությամբ, ոչ միայն անվտանգության ոլորտում օգնություն ստացող, այլեւ այն մատուցող կողմ ու փորձագիտական ռեսուրս՝ ԵՄ գործընկերների եւ անդամ պետությունների համար»,- ասել էր Դինեսկուն Մոլդովայում աշխատանքն ավարտելիս։

Go to News Site

Google Play

App Store