Rússar hafa byggt upp net herstöðva nærri Norðurlöndum á skömmum tíma

Fréttastofa RÚV

Rússar hafa byggt upp net herstöðva nærri Norðurlöndum á skömmum tíma

Ítarleg rannsókn norrænu ríkisfjölmiðlanna DR , NRK og SVT sýnir að Rússar hafa stóraukið vígbúnað sinn við landamærin að aðildarríkjum Atlantshafsbandalagsins síðustu tvö árin. Greining á gervihnattamyndum sýnir að þeir hafa byggt upp herstöðvar fyrir fjölda hermanna síðustu tvö árin. Í vetur hafa þeir staðið í miklum framkvæmdum við landamærin að Finnlandi. Einnig er uppbygging nærri norsku landamærunum, við Finnmörku, nyrsta hérað Noregs, og við landamæri Rússlands að Eystrasaltsríkjunum. Í umfjöllun NRK segir að Vladimír Pútín, forseti Rússlands, sé að búa sig undir nýtt stríð og gæti verið tilbúinn innan fáeinna ára. Nýjar herstöðvar og birgðastöðvar hafa risið og farartækjum hersins hefur fjölgað til muna. Við landamæri Rússlands og Noregs eru 17 þúsund rússneskir hermenn andspænis 1.500 Norðmönnum. SVT hefur eftir leyniþjónustu sænska hersins að Rússar séu að byggja upp herstöðvar sem megi fylla af hermönnum þegar stríðinu í Úkraínu lýkur. Brian Nissen hershöfðingi leiðir sveitir Atlantshafsbandalagsins í Eystrasaltsríkjunum og Póllandi. Hann sagði í samtali við SVT að meðan á stríðinu í Úkraínu stendur sé hættan á stríði á norðurslóðum metin lítil. Ef til stríðs kæmi yrði það hins vegar tilvistarstríð, ekki aðeins fyrir ríkin við Eystrasalt þar sem lífshættir og lýðræði ríkjanna væri undir.

Go to News Site

Google Play

App Store