Fréttastofa RÚV

Fleiri andvígir ESB-aðild en fylgjandi

Meirihluti þeirra sem taka afstöðu í nýrri skoðanakönnun er andvígur aðild Íslands að Evrópusambandinu. Gallup kannaði afstöðu fólks fyrir Viðskiptablaðið . 54 prósent segjast andvíg aðild en 46 prósent fylgjandi. Ef litið er til svara allra sést að 46 prósent eru andvíg aðild, 39 prósent fylgjandi og 16 prósent taka ekki afstöðu. Þeim sem eru fylgjandi aðild hefur fækkað úr 44 prósentum í apríl í fyrra og þeim sem eru andvíg hefur fjölgað úr 36 prósentum. 29 prósent eru alfarið andvíg aðild og hefur það hlutfall ekki verið hærra. Spurt var um afstöðu fólks til þess að Ísland gangi í Evrópusambandið en ekki til þess hvort að viðræður um aðild fari fram. Þjóðaratkvæðagreiðsla um ESB-viðræður fer fram 29. ágúst. Enn mælist yfirgnæfandi stuðningur við aðild meðal stuðningsmanna Viðreisnar og Samfylkingarinnar en sá stuðningur hefur þó minnkað, að því er Viðskiptablaðið greinir frá. Mest er andstaðan í Miðflokknum þar sem 86 prósent eru á móti aðild. Fleiri Reykvíkingar eru fylgjandi en andvígir aðild en andstæðingar aðildar eru fleiri en fylgjendur hennar bæði í nágrannasveitarfélögum Reykjavíkur og á landsbyggðinni.

Go to News Site

Google Play

App Store