Add source Login
Dregur úr fordómum í garð geðsjúkdóma

Dregur úr fordómum í garð geðsjúkdóma

Verulega hefur dregið úr fordómum í garð geðsjúkdóma á undanförnum áratugum. Þetta sýna niðurstöður rannsóknar á vegum Geðhjálpar sem kynnt var í dag. Í rannsókninni var meðal annars spurt út í viðhorf almennings til fólks með geðrænan vanda og þátttöku þeirra í samfélaginu. Árið 2006 töldu 29 prósent svarenda að fólk með þunglyndi ætti ekki að fá að gegna opinberum embættum. Hlutfallið var komið niður í 15 prósent fyrir fjórum árum og niður í 14 prósent í fyrra. Einnig var spurt um fólk með geðklofa. Þar er almennt meira um fordóma. Árið 2006 töldu 48 prósent að manneskja með geðklofa ætti ekki að fá að kenna börnum. Hlutfallið var komið niður í 36 prósent fyrir fjórum árum og 18 prósent í fyrra. Spurt var um fleiri atriði í rannsókninni og í öllum tilvikum dró úr fordómum í garð fólks með geðsjúkdóma. Sigrún Ólafsdóttir, prófessor í félagsfræði við Háskóla Íslands sem stýrði rannsókninni, segir aukna vitund um eðli geðsjúkdóma skýra þessa þróun að miklu leyti. „Við erum að sjá að frá 2022 til 2025 þá hefur dregið verulega úr fordómum gagnvart geðklofa og svo framarlega sem ég veit þá er það hreinlega í fyrsta skipti sem við sjáum það gerast á heimsvísu,“ segir Sigrún. „Og við erum líka að sjá að þær leiðir sem hafa verið notaðar í geðheilbrigðisumræðu á Íslandi undanfarna tvo áratugi og hafa orðið sterkari á síðustu árum eru að skila árangri varðandi fordóma,“ segir Sigrún. Grímur Atlason framkvæmdastjóri Geðhjálpar segir að þrátt fyrir að dregið hafi úr fordómum sé baráttunni ekki lokið. „Það kemur auðvitað fram í þessari könnun að það eru fordómar til staðar í samfélaginu. Það er mismunun til staðar. Hún kemur oft út frá vanþekkingu og óttanum við hið óþekkta og hið skrítna,“ segir Grímur.

Fá engar bætur eftir að fæðing endaði skelfilega

Fá engar bætur eftir að fæðing endaði skelfilega

Úrskurðarnefnd í vátryggingamálum hefur hafnað kröfu foreldra í sjúklingatryggingu ónefndrar heilbrigðisstofnunar hjá ónefndu tryggingafélagi. Gerðu foreldrarnir alvarlegar athugasemdir við vinnubrögð á stofnuninni við meðhöndlun móðurinnar, þegar hún gekk með dóttur þeirra, og vildu þeir meina að slæleg vinnubrögð stofnunarinnar hefðu átt verulega þátt í hversu illa fór þegar móðirin var loks send á Landspítalann til Lesa meira

Sádarnir gætu gert tilraun í sumar

Sádarnir gætu gert tilraun í sumar

Félög í Sádi-Arabíu hafa áhuga á Harry Kane, samkvæmt þýska miðlinum Kicker. Samningur Kane við Bayern Munchen rennur út eftir næstu leiktíð og talið er að báðir aðilar hafi rætt um framlengingu, en ekkert er þó í hendi. Sádar gætu veitt Bayern alvöru samkeppni um undirskrift kappans og án efa boðið framherjanum væna launahækkun. Kane, Lesa meira

Krakkaheimskviður: Saga Vetrarólympíuleikanna

Krakkaheimskviður: Saga Vetrarólympíuleikanna

Fyrir suma eru Ólympíuleikar eins og jólin, enda eru þeir hlaðborð fyrir íþróttaáhugafólk. Þetta er eitt frægasta íþróttamót mannkynssögunnar og færasta íþróttafólk heims kemur þar saman. Saga leikanna er löng og áhugaverð, og fjallað var um hana í Krakkaheimskviðum helgarinnar. Friðartákn og trúarhátíð Í Grikklandi til forna voru íþróttakappleikir algengir en Ólympíuleikarnir eru þekktastir þeirra. Elstu heimildirnar um leikana eru kapphlaup árið 776 fyrir okkar tímatal en leikarnir gætu verið enn þá eldri. Þeir voru haldnir á fjögurra ára fresti. Fyrst var líklega bara keppt í kapphlaupi en síðan bættust við fleiri keppnisgreinar eins og langstökk, kringlukast og spjótkast. Leikarnir draga nafn sitt af staðnum þar sem þeir fóru fram, borginni Ólympíu. Íbúar hinna mörgu borgríkja í Grikklandi sendu fremstu íþróttagarpa sína til borgarinnar í eina viku í júlí, fjórða hvert ár. Erjur milli borgríkja voru þá lagðar til hliðar og leikarnir voru þess vegna líka friðartákn. Þeir voru líka trúarhátíð til heiðurs Seifi, sem var æðsti guðinn í trú Grikkja. Ólympíuleikarnir voru haldnir á fjögurra fresti í næstum því 1100 ár. Síðustu leikarnir til forna voru haldnir árið 393 eftir krist en voru eftir það bannaðir, sérstaklega vegna tengsla við heiðni. Leikarnir endurvaktir Leikarnir voru ekki haldnir í mörg hundruð ár þar til árið 1896 að þeir voru endurvaktir í þeirri mynd sem við þekkjum þá nú. Þeir skiptast í vetrar- og sumarleika og samhliða þeim er haldið Ólympíumót fatlaðra. Fyrstu Sumarólympíuleikarnir voru árið 1896 í Aþenu í Grikklandi og fyrstu Vetrarólympíuleikarnir árið 1924 í Chamonix í Frakklandi. Til að byrja með voru leikarnir haldnir sama árið, aðrir um sumar og hinir um vetur, til að mæta mismunandi þörfum íþróttagreinanna. Frá árinu 1994 hafa hins vegar verið tvö ár á milli leikanna, og því þurfa aðdáendur þeirra sem betur fer ekki að bíða eins lengi. Snoop Dogg og Formúla 1 Eitt þekktasta tákn Ólympíuleikanna er ólympíuhringirnir sem tákna heimsálfurnar fimm sem taka þátt í leikunum. Sjötta heimsálfan, Suðurskautslandið, er ekki með því þar býr enginn. Svo er það ólympíueldurinn. Í Grikklandi til forna logaði hann allt árið við altari gyðjunnar Heru. Hann var svo aftur kynntur til sögunnar á leikunum í Amsterdam í Hollandi 1928 og sérstakur ólympíukyndill var fyrst notaður á leikunum í Berlín í Þýskalandi 1936. Eins og til forna eru geislar sólar notaðir til að kveikja eldinn í Ólympíu. Síðan fer hann á milli hlaupara, frá einu landi til annars þar til komið er til borgarinnar sem er gestgjafi Ólympíuleikanna hverju sinni. Í ár fluttu eldinn meira en 10.000 kyndilberar þessa 12.000 km frá Ólympíu til Mílanó. Þar á meðal aðalleikarar vinsælu þáttanna um ástarsamband íshokkíleikara, Heated Rivalry, tónlistarmaðurinn Snoop Dogg og 19 ára Formúlu 1-kappinn Kimi Antonelli. Hver sem er, eldri en 14 ára, getur sótt um að verða kyndilberi, en það er samt nefnd sem fer yfir umsóknirnar og velur fólk og sögur sem vekja sérstaka athygli og „fanga anda leikanna“. Hlustaður á umfjöllun Krakkaheimskviða um Vetrarólympíuleikana í heild sinni í spilaranum hér að neðan. Krakkaheimskviður eru á dagskrá Rásar 1 alla sunnudaga eftir hádegisfréttir. Þættirnir lenda á hlaðvarpsveitum snemma á laugardagsmorgnum.

„Staðan var slæm fyrir en þetta er orðið afleitt“

„Staðan var slæm fyrir en þetta er orðið afleitt“

Tölurnar tala sínu máli um vanda Landspítalans. „Staðan hefur verið óviðunandi,“ segir Runólfur Pálsson forstjóri Landspítalans Þar eru núna 110 manns sem hafa lokið meðferð á Landspítalanum en bíða eftir plássi á hjúkrunarheimili. „Við höfum verið að þrauka síðustu ár, ég held að það sé alveg óhætt að segja það, með tilheyrandi álagi á starfsfólkið og neikvæðum áhrifum á upplifun og jafnvel þjónustu sem sjúklingar hafa verið að fá vegna örtraðar sem jafnan er fyrir hendi á bráðamóttökunni,“ segir Runólfur. „En þróunin síðustu mánuði, það er nú tilefni þess að við sendum minnisblað til ráðuneytisins, allra síðustu mánuði og síðustu vikur, þá hefur þróunin verið síversnandi.“ Staðan á bráðamóttökunni var slæm fyrir en nú er hún afleit, segir forstjóri spítalans. Þar bíður fólk í rúmlega tvo sólarhringa eftir legurými. Í ofanálag er krafa um hagræðingu, en tækifærin til þess að hagræða eru takmörkuð að mati forstjórans. Á bráðamóttökunni eru 50-60 manns sem bíða eftir að komast á legudeild. Þessir sjúklingar bíða að meðaltali í rúma tvo sólarhringa eftir legurými. „Þetta er veruleg lenging frá því sem hefur verið. Staðan var slæm fyrir en þetta er orðið afleitt,“ segir Runólfur. „Við óttumst náttúrlega verulega um öryggi sjúklinga, auk þess sem er spurning hversu mikið okkar frábæra starfsfólk heldur út,“ bætir hann við. Runólfur segir að færa þurfi allt að 50 manns af spítalanum á hjúkrunarheimili til að þau endurheimti legurými. „Ég veit vel að það væri búið að ganga í það verk ef slík úrræði væru í augnsýn, en við verðum með einhverjum hætti að búa þau til.“ Í minnisblaði til heilbrigðisráðuneytisins var stungið upp á því að hjúkrunarheimilin tvímenni í herbergi tímabundið. Heilbrigðisráðherra sagði í fréttum RÚV í síðustu viku að Landspítali hefði forgang að hjúkrunarheimili sem opnar á næstunni í Urðarhvarfi með pláss fyrir næstum 100 manns. Takmörkuð tækifæri til hagræðingar Í ofanálag er allmikil niðurskurðarkrafa á Landspítala fyrir þetta ár, eða allt að fimm milljarðar. Kostnaðarauki vegna kjarasamningana vegur þungt. Runólfur segir viðræður um það standa yfir við heilbrigðisráðherra. „Við undirbúum okkur náttúrlega fyrir það versta en vonum það besta. Við erum að skoða hvaða möguleika við höfum til að hagræða á móti þessu. En eins og álagið hefur verið á þjónustu spítalans, sem ég verð að segja er gríðarlegt. Þá eru tækifæri til slíkrar hagræðingar mjög takmörkuð,“ segir Runólfur.